Qońıratta birinshi jeke menshik mektep jumısına start berildi
2026-09-03 15:00:00 / Министрлик
Qońırat rayonında bilimlendiriw tarawında jańa dáwir baslanbaqta. Búgin rayondaǵı birinshi jeke menshik mektep - "Utegenov School" saltanatlı túrde óz jumısın basladı.
Jańa bilimlendiriw dárgayınıń ashılıw máresimi Ózbekstan Respublikası Mámleketlik ǵárezsizliginiń 35 jıllıǵı aldında kóterińki ruwxta bolıp ótti. Onda Ózbekstan Respublikası Joqarı bilimlendiriw, ilim hám innovaciyalar ministri Sharipov Kongratbay Avezimbetovich, Qońırat rayonı hákimi, mektep jámááti, muǵallimler, oqıwshılar, ata-analar hám jámiyetshilik wákilleri qatnastı.
Ilajda elimizde bilimlendiriw sistemasın rawajlandırıw, jas áwladqa zamanagóy hám sapalı bilim alıw ushın múnásip sharayatlar jaratıw baǵdarında ámelge asırılıp atırǵan reformalar haqqında sóz boldı.
Ásirese, Prezidentimizdiń 2025-jıl 1-apreldegi PQ-132-sanlı qararı tiykarında Qońırat rayonın jedel kompleksli rawajlandırıw, sonıń ishinde, jaslar ushın zamanagóy bilimlendiriw hám sociallıq infrastrukturanı qáliplestiriw boyınsha belgilengen wazıypalardıń ámeliy nátiyjeleri atap ótildi.
500 oqıwshıǵa mólsherlengen "Utegenov School" - Qońıratta jeke menshik bilimlendiriw tarawındaǵı áhmiyetli baslamalardan biri. Mektepte oqıwshılardıń sapalı bilim alıwı, zamanagóy kónlikpelerdi iyelewi, erkin pikirlewi hám óz qábilyetin júzege shıǵarıwı ushın zárúr sharayatlar jaratılǵan.
Saltanatlı ashılıw máresiminde shıǵıp sóylegen Ózbekstan Respublikası Joqarı bilimlendiriw, ilim hám innovaciyalar ministri Sharipov Kongratbay Avezimbetovich jańa bilimlendiriw dárgayın rásmiy ashıp berdi hám mektep jámááti hám oqıwshılardı usı áhmiyetli waqıya menen qızǵın qutlıqladı.
Ministr óziniń shıǵıp sóylegen sózinde jeke menshik bilimlendiriw mákemeleriniń kóbeyiwi bilimlendiriw tarawında salamat báseki ortalıǵın qáliplestiriw, bilimlendiriwdiń sapasın arttırıw hám jaslar ushın jańa imkaniyatlar jaratıwda úlken áhmiyetke iye ekenin atap ótti.
Sonday-aq, mektep intakeri Ǵayratdin Utegenov hám jámáátine bul iygilikli baslamanı ámelge asırǵanı ushın minnetdarshılıq bildirilip, bilimlendiriwdiń sapasın arttırıw, oqıwshılardıń bilim hám potencialın rawajlandırıw baǵdarındaǵı jumısına tabıslar tiledi.
Ilaj dawamında Qońırat rayonı hákimi de oqıwshılar menen qızǵın sáwbetlesip, olardı jańa mektep penen qutlıqladı. Jaslardıń kelesi oqıwlarında áwmet, joqarı nátiyjeler hám úlken jetiskenliklerge erisiwin tilep, jaratılǵan imkaniyatlardan únemli paydalanıwǵa shaqırdı.
Ashılıw máresiminde bilimlendiriwdiń sapasın arttırıwda mektep - shańaraq - jámiyetshiliktiń birge islesiwiniń áhmiyeti ayrıqsha atap ótildi. Sebebi, bilimli, erkin pikirleytuǵın hám watansúyiwshi áwladtı tárbiyalaw - hámmemizdiń ulıwma maqsetimiz.
Jańa mekteptiń iske qosılıwı Qońırat rayonında bilimlendiriw tarawında salamat báseki ortalıǵın qáliplestiriw, ata-analar ushın bilimlendiriw tańlawların keńeytiw hám jaslar ushın zamanagóy bilim alıw imkaniyatların jáne de arttırıw jolındaǵı áhmiyetli qádem boldı.
"Utegenov School" - búgin óz esiklerin ashqan jáne bir bilimlendiriw dárgayı emes. Bul Qońırat jaslarınıń úlken arzıwları, jańa bilimleri hám aydın keleshegine ashılǵan jańa esik bolıp esaplanadı.
Jańa bilimlendiriw dárgayına qut-bereket, ustazlarǵa kúsh-ǵayrat, oqıwshılarǵa bolsa ilim jolında úlken tabıslar tileymiz!
Ilimli áwlad - eldiń eń úlken baylıǵı!