Qaraqalpaqstan Respublikası Qońırat rayonı hákimligi

Búgin Qońırat rayonı hákimliginde Adam sawdasına qarsı gúresiw hám Múnásip miynet máseleleri boyınsha rayonlıq komissiyanıń májilisi bolıp ótti.

Májiliste Ózbekstan Respublikası Prezidentiniń 2023-jıl 21-dekabrdegi "Adam sawdasına qarsı gúresiw hám múnásip miynet principlerin keńnen engiziwge baylanıslı qosımsha ilajlar haqqında"ǵı PP-210-sanlı Pármanınıń orınlanıwın támiyinlew máseleleri dodalandı.

Kún tártibine muwapıq, rayonlıq komissiya tárepinen 2026-jıldıń birinshi yarım jıllıǵı dawamında adam sawdasınıń aldın alıw, májbúriy hám balalar miynetine jol qoymaw, xalıqtıń huqıqıy xabardarlıǵın arttırıw hám múnásip miynet principlerin keńnen engiziw baǵdarında ámelge asırılǵan jumıslar boyınsha esabat tıńlandı.

Sonday-aq, juwapker shólkemler tárepinen alıp barılǵan úgit-násiyat jumısları, anıqlanǵan mashqalalar hám olardı saplastırıw boyınsha kórilip atırǵan ilajlar dodalanıp, jumıs nátiyjeliligin bunnan bılay da arttırıw boyınsha usınıslar bildirildi.

Májilis juwmaǵında 2026-jıldıń ekinshi yarımında ámelge asırılıwı kerek bolǵan tiykarǵı wazıypalar hám keleshektegi ilajlar belgilep berildi. Juwapker uyım hám shólkemlerdiń basshılarına islep shıǵılǵan Pármannıń orınlanıwın támiyinlew, profilaktikalıq ilajlardı kúsheytiw, xalıqtıń huqıqıy mádeniyatın arttırıw jáne múnásip miynet principlerin ámeliyatqa izbe-iz engiziw boyınsha tiyisli tapsırmalar berildi.