Qaraqalpaqstan Respublikası Qońırat rayonı hákimligi

Ózbekstan Respublikası Mámleketlik ǵárezsizliginiń 35 jıllıǵın múnásip belgilew maqsetinde Qońırat rayonı "Ráwshan" awıl puqaralar jıyınında "Birden-bir Watan, birden-bir xalıq bolıp, jańa turmıs hám keleshek jaratamız!" súreni astında "Ǵárezsizlik toyı" festivalı bolıp ótti.

Festivaldan gózlengen tiykarǵı maqset jámiyette milletleraralıq tatıwlıq hám puqaralar awızbirshiligin bekkemlew, túrli millet hám xalıq wákilleri arasında óz-ara húrmet, keńpeyillik hám sociallıq birge islesiw ortalıǵın bunnan bılay da rawajlandırıw, jaslardı watansúyiwshilik hám joqarı puqaralıq juwapkershilik ruwxında tárbiyalaw, milliy qádiriyatlardı qásterlep-saqlaw jáne awızbirshilikti bekkemlewden ibarat boldı.

Festival sheńberinde Qońırat rayonı Mádeniyat orayınıń dóretiwshileri tárepinen tayarlanǵan koncert baǵdarlaması qoyıp berildi.

Ilaj sońında "Bir millet - bir júrek" ideyası tiykarında jaslar arasında kitapqumarlıq mádeniyatın arttırıwǵa qaratılǵan viktorina oyınları shólkemlestirildi. Sonday-aq, rayonlıq Málimleme-kitapxana orayı tárepinen kitaplar kórgizbesi qoyılıp, kitapqumarlıqtı úgit-násiyatlawǵa ayrıqsha itibar qaratıldı.