Qaraqalpaqstan Respublikası Qońırat rayonı hákimligi

Qońırat rayonı Fermerler keńesi prezidiumınıń fermerlerge
múrájat
Húrmetli fermerler!

Mámleketimizde fermerlerge mámleketimiz tárepinen jaratılıp atırǵan jeńillikler, subsidiyalar hám imkaniyatlar jıldan-jılǵa keńeyip barmaqta. Ásirese, usı jılı biyday jetistiriw boyınsha Mámleketimiz basshısınıń párman hám qararları jáne Húkimettiń tiyisli ilajları Siz, fermerlerge ǵálleden joqarı zúráát alıw ushın bekkem tiykar jarattı.

Sonnan:

-biyday jetistiriw qárejetleri ushın ajıratılǵan jeńilletilgen kreditlerdi ónim jılınıń 1-avgustına shekem tolıq qaytarǵan fermer xojalıqlarına usı kreditler boyınsha tólengen procent tólemleriniń 4 procentlik bólegi mámleket tárepinen kompensaciyalanıp, qaytarıp beriledi;

-2026-jıl óniminen baslap biydaydı óz qarjıları yamasa kommerciyalıq banklerdiń kreditleri esabınan jetistirip, onı belgilengen tártipte birja sawdaları arqalı yamasa mámleketlik resurs ushın realizaciya etken awıl xojalıǵı kárxanalarına satılǵan ónim bahasınıń 10 procenti muǵdarında subsidiya ajıratıladı;

-dizel janılǵısın satıp alıwǵa baylanıslı qárejetlerdi bir bólegin qaplaw maqsetinde 2 million som muǵdarında subsidiya ajıratılıwı sıyaqlı jeńillikler fermer xojalıqlarınıń ekonomikalıq imkaniyatların jáne de keńeytip, ǵálleden joqarı hám mol ónim jetistiriw ushın bekkem tiykar jarattı.

Bunday jeńilliklerden únemli paydalanǵan rayonımızdaǵı kópshilik fermerler belgilengen mámleketlik resurs, waqtınsha saqlaw hám tuqım boyınsha minnetlemelerin tolıq orınlap, kóplegen fermer xojalıqları hár gektardan 100 centnerden aslam zúráát jetistiriwge eriskeni hesh birimizge sır emes.

Nátiyjede kóplegen fermerlerdiń dáramatı ótken jıllarǵa salıstırǵanda 1,5-2 esege artıp, qosımsha tarmaqlardı rawajlandırıwǵa xızmet etip atırǵanın Siz, fermerler ózińiz de kórip tursız.

Qádirli fermerler!
Mámleketimiz tárepinen bıyılǵı jılı ǵálle jetistiriwshiler ushın keń kólemli jeńillikler menen imkaniyatlar jaratılǵanına qaramastan, ayırım fermer xojalıqları tárepinen mámleketlik resurs, waqtınsha saqlaw hám tuqım boyınsha minnetlemeler itibarsız qaldırılıp atırǵanın esletip ótiwdi zárúr, dep esaplaymız.

Ózbekstan Respublikasınıń "Xojalıq júrgiziwshi subektler jumısınıń shártnamalıq-huqıqıy bazası haqqında"ǵı Nızamınıń 25-statyasına muwapıq, tovarlardı jetkerip beriw múddetleri keshiktirilgen yamasa tolıq jetkerip berilmegen jaǵdayda, keshiktirilgen hár bir kún ushın orınlanbaǵan minnetlemeniń bahasınıń 0,5 procenti muǵdarında penya óndiriledi.

Bunda penya tóleniwi shártnamalıq minnetlemelerdi buzǵan tárepti jetkerilgen zıyandı qaplaw minnetlemesinen azat etpeydi. Usı múnásibet penen usı Nızam talaplarına qatań ámel etiw zárúrligin jáne bir márte Siz, húrmetli fermerler itibarına usınamız.

Sonday-aq, minnetlemelerdi orınlamaw hám jer uchastkasınan aqılǵa uǵras paydalanbaw jer ijarası shártnamasınıń biykar etiliwine alıp keliwi múmkin ekenligin hár birińizge eskertemiz.

Solay eken, hár bir kúnniń qádirine jetip, tómendegi wazıypalardı óz waqtında ámelge asırıw arqalı ǵálle boyınsha moynıńızdaǵı minnetlemelerdi tolıq orınlawıńızdı soraymız.

Birinshiden, atızlarda jetistirilgen zúráátti jedellik penen qısqa múddetlerde hám shıǵınǵa jol qoymastan jıynap alıń hám mámleketlik resurs, waqtınsha saqlaw hám tuqımlıq boyınsha minnetlemelerińizdi óz waqtında orınlań.

Ekinshiden, mámleketlik qor esabınan alınǵan jeńilletilgen kreditlerdi óz waqtında qaytarıp, 4 procentlik kompensaciya hám basqa da belgilengen jeńilliklerden nátiyjeli paydalanıń.

Úshinshiden, "Xojalıq júrgiziwshi subektler jumısınıń shártnamalıq-huqıqıy bazası haqqında"ǵı Nızamnıń 25-statyasında názerde tutılǵan járiyma hám penya qollanılıwına sebep bolatuǵın jaǵdaylarǵa jol qoymaw.

Tórtinshiden, ǵálleden bosaǵan maydanlardı izbe-iz sabannan tazalap, tákirarıy, dáramatlı hám eksportqa qolaylı eginlerdi egiwdi shólkemlestiriw arqalı qosımsha dáramat alıwǵa erisiń.

Áziz fermerler!

Xalqımızdıń abadan turmısı, dasturxanımızdıń molshılıǵı, bazarlarımızda nan hám nan ónimleriniń jeterli bolıwı jáne bahalardıń turaqlılıǵı kóp tárepleme Siziń búgingi miynetińiz, ǵálle orım-jıyının óz waqtında juwmaqlawıńız hám mámleketlik rezervke belgilengen kólemde dán tapsırıwıńızǵa baylanıslı ekenin umıtpań.

Elimizdiń rawajlanıwı hám xalqımızdıń abadanlıǵı jolında bársheńizdi mámleketlik resurs, waqtınsha saqlaw hám tuqım boyınsha minnetlemelerińizdi óz waqtında hám tolıq orınlawǵa shaqıramız.

Qońırat rayonı Fermerler keńesi prezidiumınıń aǵzaları