Qońırat rayonında náshebentlikke qarsı gúresiw tarawındaǵı nızamshılıqtaǵı jańalıqlar dodalandı
2026-06-20 11:00:00 / Министрлик
2026-jıl 20-iyun kúni Qońırat rayonı "Jaslar orayı" imaratında Jınayat isleri boyınsha Qońırat rayonlıq sudınıń tergew sudyası B.Aymuratov, Qońırat rayonı Ishki isler bólimi juwapkerleri hám rayon puqaraları qatnasıwında ushırasıw shólkemlestirildi.
Ilajda Ózbekstan Respublikasınıń 2026-jıl 11-iyunde qabıl etilgen "Ózbekstan Respublikasınıń ayırım nızam hújjetlerine náshebentlik quralları, psixotrop qurallar yamasa olardıń analoglarınıń hám kúshli tásir etetuǵın elementlerdiń nızamǵa qayshı aylanısı ushın juwapkershilikti jetilistiriwge qaratılǵan qosımshalar hám ózgerisler kirgiziw haqqında"ǵı ÓRN-1151-sanlı Nızamınıń mazmun-mánisi hám jámietlik turmıstaǵı áhmieti boyınsha túsinikler berildi.
Ushırasıwda shıǵıp sóylegen tergew sudyası B.Aymuratov bul nızam dúnya kóleminde sintetikalıq narkotikler qáwipi artıp baratırǵanı, olardıń internet tarmaqları arqalı tarqatılıwı hám jasırın narkolaboratoriyalardıń sanı kóbeyip atırǵan sharayatta xalıqtıń salamatlıǵın, millet genofondı hám keleshek áwlad máplerin qorǵaw maqsetinde qabıl etilgenin atap ótti.
Sonday-aq, nızam menen náshebentlik hám "apteka náshebentligi"ne qarsı gúresiwdiń huqıqıy mexanizmleri jáne de kúsheytilgeni atap ótildi. Atap aytqanda, Jınayat kodeksine "Xalıqtıń salamatlıǵı hám genofondına qarsı jınayatlar" dep atalǵan óz aldına bap kirgizilgen bolıp, bul náshebentlik penen baylanıslı jınayatlarǵa pútkilley jańa qatnastı belgileydi.
Atap ótilgenindey, endi bunday qılmıslar tek ǵana jámietlik qáwipsizlikke qarsı jınayat emes, al millet salamatlıǵı hám keleshek áwlad táǵdirine qáwip sıpatında bahalanadı. Jańa bap quramına burınnan bar statyalar menen bir qatarda xalıqtıń densawlıǵı ushın oǵada qáwipli bolǵan jańa jınayat quramları da kirgizilgen.
Ilaj dawamında Hákimshilik juwapkershilik haqqındaǵı kodekske kirgizilgen áhmietli ózgerisler haqqında da maǵlıwmat berildi. Sonıń ishinde, náshebentlik quralların, psixotrop yamasa kúshli tásir etetuǵın elementlerdi jámietlik orınlarda paydalanǵanı ushın Jınayat kodeksiniń 1871-statyasında juwapkershilik belgilengen bolıp, huqıqbuzarlarǵa 15 sutkaǵa shekem hákimshilik qamaqqa alıw jazası qollanılıwı múmkin ekenligi túsindirildi.
Ilaj sońında qatnasıwshılardıń sorawlarına juwap berildi hám xalıqtı náshebentlikke qarsı gúresiw, salamat turmıs tárizin úgit-násiyatlaw hám jaslardı hár qıylı zıyanlı illetlerden saqlaw baǵdarında belsendi bolıwǵa shaqırdı.
Qońırat rayonı hákimligi Málimleme xızmeti.