Tábiyǵıy gaz hám elektr energiyasın tutınıw ushın bazalıq norma sheńberindegi hám bazalıq normadan asqan bahalar arasındaǵı ayırmashılıqtı kompensaciyalaw haqqında
2026-06-12 10:00:00 / Министрлик
Ózbekstan Respublikası Ministrler Kabinetiniń 2024-jıl 16-apreldegi “Janılǵı-energetika tarawında bazar mexanizmlerin engiziwdiń qosımsha ilajları haqqında”ǵı 204-sanlı qararına tiykarlanıp, tábiyǵıy gaz hám elektr energiyasın tutınıw ushın bazalıq norma sheńberindegi hám bazalıq normadan asqan bahalar arasındaǵı ayırmashılıqtı kompensaciyalaw tártibi belgilengen.
Bul kompensaciya sociallıq qorǵawǵa mútáj shańaraqlardı qollap-quwatlaw, energiya resurslarınan paydalanıwda olardıń qárejetlerin jeńilletiw maqsetinde engizilgen.
Kompensaciya alıw ushın múrájat etiw tártibi
Kompensaciya alıw ushın arza beriwshi hár aydıń 16-sanına shekem wákillikli uyımǵa múrájat etedi. Múrájat tómendegi tártiplerde ámelge asırılıwı múmkin:
Mámleketlik xızmetler orayı arqalı;
Wákillikli uyımǵa tikkeley barǵan halda;
Shańaraq jasaytuǵın máhállege biriktirilgen sociallıq xızmetker arqalı;
“Birden-bir milliy sociallıq qorǵaw” málimleme sisteması arqalı;
Birden-bir interaktiv mámleketlik xızmetler portalı arqalı erkin túrde.
Arza beriwshiniń shańaraǵı reestrge kirgizilgeni haqqındaǵı maǵlıwmatlar tiyisli málimleme sistemaları arqalı tekseriledi. Shańaraqtıń elektr energiyası hám yamasa tábiyǵıy gazden paydalanıwı haqqındaǵı maǵlıwmatlar bolsa “Aymaqlıq elektr tarmaqları” AJ hám “Aymaqgaztámiynat” AJnıń tiyisli málimleme sistemalarınan uyımlararalıq elektron birge islesiw arqalı alınadı.
Kompensaciya tayınlawdan bas tartıw jaǵdayları
Tómendegi jaǵdaylarda kompensaciya tayınlawdan bas tartıladı:
Shańaraqtıń jan basına tuwrı keletuǵın dáramatı eń kem tutınıw qárejetleriniń 1,5 esesinen joqarı ekenligi anıqlanǵanda;
Arza beriwshi yamasa onıń shańaraq aǵzalarınıń múlkinde yamasa paydalanıwında jámi birden aslam kóshpes múlk hám jer uchastkası bar bolǵanda;
Arza beriwshi yamasa onıń shańaraq aǵzalarınıń múlkinde bir yamasa onnan artıq turaq jay emes orınlar bar bolǵanda;
Arza beriwshi yamasa onıń shańaraq aǵzalarında nızamshılıq hújjetlerinde belgilengen tártipte óz atına rásmiylestirilgen, paydalanıwda bolǵan yamasa isenimnama tiykarında basqarılatuǵın texnikalıq jaǵdayı saz avtotransport quralları hám arnawlı texnikalar bar bolǵanda.
Bunday qurallarǵa tómendegiler kiredi:
Islep shıǵarılǵan múddeti 12 jıldan aspaǵan, texnikalıq jaǵdayı saz bolǵan jeńil avtotransport quralı;
Shańaraq aǵzası I yamasa II topar mayıp bolǵanda, sonday-aq 18 jasqa shekemgi balalıqtan mayıp bolǵan jaǵdayda, islep shıǵarılǵan múddeti 7 jıldan aspaǵan jeńil avtotransport quralı;
Islep shıǵarılǵan múddeti 15 jıldan aspaǵan, texnikalıq jaǵdayı saz bolǵan júk tasıwshı avtotransport quralı;
Avtobus, mikroavtobus, ekskavator, traktor, kombayn, júk tasıwshı avtotransport qurallarınıń tirkemeleri hám yarım tirkemeleri, avtokran hám basqa da qurılıs texnikaları;
Jámi eki hám onnan artıq texnikalıq jaǵdayı saz bolǵan jeńil yamasa júk tasıwshı avtotransport quralları hám arnawlı texnikalar.
Ísıtıw máwsimi ushın tábiyǵıy gaz boyınsha kompensaciya muǵdarın esaplawda, máwsimniń baslanıwı yamasa tamamlanıwı belgilengen sánedegi ay ısıtıw máwsimi ayı sıpatında esapqa alınadı.
Kompensaciyanı tólep beriw tártibi
Ózbekstan Respublikası Prezidenti janındaǵı Sociallıq qorǵaw milliy agentligi “Birden-bir reestr” málimleme sisteması arqalı kompensaciya alıwshı shańaraqlar boyınsha tólemler dizimin qáliplestiredi.
Bul dizimler sorawnama toltırılǵan aydan keyingi aydıń 5-sanına shekem AK “Xalıq banki”ne jiberiledi.
Ekonomika hám qarjı ministrligi menen birgelikte kompensaciya alıwshı shańaraqlarǵa kompensaciya tólemin tólep beriw ushın zárúr qarjılar hár aydıń 5-sánesinen 25-sánesine shekem AK “Xalıq banki”ne ótkerip beriledi.
AK “Xalıq banki” kompensaciya tólemin arza berilgen aydan keyingi aydıń 27-sánesine shekem kompensaciya alıwshınıń sociallıq kartası yamasa bank kartasına tólep beredi.
Eger kompensaciya alıwshınıń atında sociallıq karta yamasa bank kartası bolmasa, tólem AK “Xalıq banki”nde onıń shańaraq aǵzaları atına ashılǵan sociallıq karta yamasa bank kartasına tólep beriliwi múmkin.
Qońırat rayonı ádillik bólimi
Mámleketlik xızmetler orayı jetekshi qánigesi: Shaxnoza Baltabayeva