Qońırat rayonında Jáhán banki qatnasıwındaǵı iri joybarlar dodalandı
2026-04-10 10:00:00 / Жыйналыслар
Qońırat rayonına Jáhán banki juwapker xızmetkerlerinen ibarat delegaciya keldi. Sapar dawamında "Ózbekstanda jasaw ushın qolaylı hám turaqlı qalalar" nátiyjege tiykarlanǵan qarjılandırıw (PforR) joybarı sheńberinde 2026-2027-jıllarda ámelge asırılıwı rejelestirilgen baslamalar hár tárepleme kórip shıǵıldı.
Dodalawlar procesinde, atap aytqanda, 2026-jılı Qońırat rayonında 4 áhmiyetli joybardıń ámelge asırılatuǵını belgilep alındı.
Sociallıq hám infrastrukturalıq investiciyalıq joybarlar sheńberinde:
"Elabat" PPJ aymaǵındaǵı 11-sanlı ulıwma bilim beriw mektebin rekonstrukciyalaw hám 330 orınlıq qosımsha imarat qurıw;
• "Kiet" APJ aymaǵındaǵı 18-sanlı ulıwma bilim beriw mektebin rekonstrukciyalaw hám 330 orınlıq qosımsha imarat qurıw;
Drayver joybarları sheńberinde:
• Rayon orayındaǵı "Qońırat sawda kompleksi" hám "Qońırat diyqan bazarı" arasında ótetuǵın jolda tunnel qurıw;
• "Qaraqalpaqstan" kóshesinde joldıń orta bólegine ajıratıwshı beton tosıqlar (bordyur) ornatıw hám zamanagóy túngi jaqtılandırıw sistemasın engiziw.
Sonday-aq, ushırasıw dawamında 2027-jılı ámelge asırılıwı rejelestirilgen perspektivalı joybarlar boyınsha da pikir alısılıp, olardıń texnikalıq-ekonomikalıq tiykarları hám ámelge asırıw mexanizmleri dodalandı.
Bul joybarlar Qońırat rayonında sociallıq infrastrukturanı rawajlandırıw, transport háreketi qáwipsizligin arttırıw hám xalıqtıń jasaw sharayatların jáne de jaqsılawǵa xızmet etedi.