Qońırat rayonında "Ǵárezsizlik toyı" festivalına start berildi
2026-06-12 16:50:00 / Министрлик
Ǵárezsizligimizdiń 35 jıllıǵı múnásibeti menen "Bir Watan, bir xalıq bolıp, jańa ómir hám keleshek jaratamız!" degen bas ideya astında Qońırat rayonında keń kólemli ruwxıy-aǵartıwshılıq hám úgit-násiyatlaw ilajları baslap jiberildi.
Atap aytqanda, rayondaǵı "Bostan," "Turan" hám "Qańlı" máhálleleri aymaǵında jaylasqan 10-sanlı Muzıka hám kórkem óner mektebinde "Ǵárezsizlik toyı" festivalı saltanatlı túrde ashıldı.
Festivaldıń ashılıw máresiminde rayon hákimligi Nuranıylar bólimi hám Ruwxıy-aǵartıwshılıq orayı rayonlıq bóliminiń basshıları shıǵıp sóylep, elimiz ǵárezsizliginiń tariyxıy áhmieti, xalqımız erisip atırǵan jetiskenlikler hám jas áwladtı watansúyiwshilik ruwxında tárbiyalawdaǵı bunday ilajlardıń ornı haqqında pikir bildirdi.
Ilaj dawamında talantlı jaslar hám kórkem óner sheberleri tárepinen qosıqlar, milliy ayaq oyınlar hám kórkem shıǵıwlar kórsetildi. Qızǵın sáwbetler hám bayram keypiyatı qatnasıwshılarǵa kóterińki ruwx baǵıshladı.
"Ǵárezsizlik toyı" festivalı xalqımızdıń awızbirshiligi, tileklesligi hám Watanǵa sadıqlıǵın jáne de bekkemlewge xızmet etpekte. Bul festival sheńberindegi ilajlar xalıq arasında milliy qádiriyatlardı ulıǵlaw, eldiń rawajlanıwı hám abadan keleshekke umtılıw ideyaların keńnen úgit-násiyatlawǵa qaratılǵan.
Qońırat rayonı hákimligi Málimleme xızmeti.