Ǵálle orımın shólkemleskenlik penen ótkerip, mol zúráát alıwǵa erisiń!
2026-06-12 13:00:00 / Пресс-релизлер
Qońırat rayonı Fermerler keńesi Prezidiumı aǵzalarınıń múrájatı
Húrmetli fermerler!
Elimizde hadal miynet etip atırǵan diyqan hám fermerlerdiń mashaqatları esabınan atızlarda mol hám bereketli ǵálle zúrááti jetistirildi.
Mámleketimiz basshısı tárepinen qabıl etilip atırǵan párman hám qararlar Siz, áziz fermerlerdiń awıl xojalıǵı ónimlerin jetistiriwde erisip atırǵan jetiskenliklerine bekkem tiykar jaratpaqta.
Búgingi kúnde respublikamızdıń kóplegen aymaqlarında fermer xojalıqları ǵálle orım-jıyının shólkemleskenlik penen alıp barıp, mámleketlik rezervke dán tapsırmaqta hám jetistirilgen mol zúráát esabınan joqarı dáramatqa erispekte.
Áziz fermerler!
Ǵálleshilik tarawında jaratılǵan imkaniyat hám jeńilliklerden nátiyjeli paydalanıń. Prezidentimizdiń 2026-jıl 8-maydaǵı "Ǵawasha hám biyday jetistiriwshilerdi finanslıq qollap-quwatlawdıń qosımsha ilajları haqqında"ǵı PP-82-sanlı Pármanı hám basqa da normativlik-huqıqıy hújjetler menen fermerler ushın bir qatar qolaylıqlar jaratıldı.
Sonıń ishinde:
• biyday jetistiriw qárejetleri ushın ajıratılǵan jeńilletilgen kreditlerdi ónim jılı 1-avgustqa shekem tolıq qaplaǵan xojalıqlarǵa kredit boyınsha tólengen procentlerdiń 4 procentlik bólegi qaytarıp beriledi;
2026-jıl óniminen baslap ǵálleni óz qarjıları yamasa kommerciyalıq kreditler esabınan jetistirip, onı belgilengen tártipte birja sawdaları yamasa mámleketlik resurslar ushın realizaciya etken awıl xojalıǵı kárxanalarına ónim bahasınıń 10 procenti muǵdarında subsidiya ajıratıladı;
• óz qarjıları esabınan jawınlatıp suwǵarıw texnologiyasın engizip atırǵan fermerlerge subsidiya qarjılarınıń 50 procenti aldınnan, qalǵan 50 procenti bolsa texnologiyalar iske qosılǵannan soń tólep beriledi;
• mámleketlik buyırtpa tiykarında masaqlı dán jetistiriw ámeliyatı biykar etilip, tarawda bazar principleri basqıshpa-basqısh engizildi;
• fermerlerge ajıratılǵan jeńilletilgen kredit qarjılarınan erkin paydalanıw, xızmet kórsetiwshi hám resurs jetkerip beriwshilerdi erkin tańlaw huqıqı berildi;
• dán satıp alıw hám satıwda birja mexanizmleriniń engiziliwi fermerlerdiń ekonomikalıq mápdarlıǵın arttırmaqta.
Qádirli fermerler!
Hár bir kún ǵanimat ekenin tereń ańlaǵan halda tómendegi wazıypalardı óz waqtında ámelge asırıwdı umıtpań:
Birinshiden, jetistirilgen zúráátti qısqa múddetlerde hám shıǵınsız jıynap alıń. Oraq-jıyınnıń hár bir kún keshigiwi ónimdarlıqtıń tómenlewine alıp keliwi múmkin. Ǵálleni mámleketlik rezervke tapsırıp, minnetlemelerińizdi tolıq orınlań hám jeńilletilgen kreditlerdi óz waqtında qaytarıp, bar jeńilliklerden paydalanıń.
Ekinshiden, hár gektar maydannan joqarı ónimdarlıqqa erisip, xojalıǵıńızdıń dáramatın arttırıń.
Úshinshiden, ǵálleden bosaǵan maydanlardı tezlik penen sabannan tazalap, dáramatlı hám eksportqa qolaylı tákirarıy eginler egiwdi shólkemlestiriń.
Tórtinshiden, máhálleńizdegi kem támiyinlengen shańaraqlar, jaslar hám hayal-qızlarǵa tákirarıy egin egiw ushın jer ajıratıp, saqawat hám awızbirshilik úlgilerin kórsetiń.
Besinshiden, mámleketimiz xalqın sapalı nan hám nan ónimleri menen támiyinlew isine múnásip úles qosıń.
Umıtpań, xalqımız dasturxanınıń molshılıǵı, bazarlarımızda nan hám nan ónimleriniń molshılıǵı jáne mámleketimizdiń azıq-awqat qáwipsizligi kóp tárepleme Siziń búgingi pidákerlik miynetińizge baylanıslı.
Bársheńizdi ǵálle orım-jıyın máwsimin shólkemleskenlik penen ótkeriwge, mámleket hám xalıq aldındaǵı juwapkershilikti tereń sezingen halda nátiyjeli miynet etiwge shaqıramız.
Qońırat rayonı Fermerler keńesi Prezidiumınıń aǵzaları