Qońırat rayonında "Jańa Ózbekstan Olimpiada shıńları" jarısınıń gezektegi basqıshı ótkerildi
2026-03-27 19:15:00 / Министрлик
Qońırat rayonı 36-sanlı ulıwma orta bilim beriw mektebiniń sport zalında mámleketimiz boylap jas sporchılar arasında ótkerilip atırǵan "Jańa Ózbekstan Olimpiada shıńları," yaǵnıy "Prezident Olimpiadası" sport jarıslarınıń Qońırat rayonı hákimi olimpiadası basqıshı sheńberinde sporttıń Taekwondo WT túri boyınsha bellesiwler shólkemlestirildi.
Jarıs joqarı dárejede, sportqa tán hadallıq hám mawasasız gúres ruwxında ótti. Onda qatnasqan jas sporchılar óz sheberligin, fizikalıq tayarlıǵın hám jeńiske bolǵan umtılısın kórsetti.
Juwmaqlawshı nátiyjelerge bola, jeńimpaz hám sıylı orın iyeleri may-iyun aylarında bolıp ótetuǵın Qaraqalpaqstan Respublikası Joqarǵı Keńesi Baslıǵı olimpiadası, yaǵnıy respublikalıq basqıshta qatnasıw huqıqın qolǵa kirgizdi.
Maǵlıwmat ushın, Qońırat rayonı hákimi olimpiadası sport jarıslarınıń 1-basqıshı sporttıń 13 túri boyınsha usı jıldıń 5-aprel kúnine shekem dawam etedi. Jarıs jeńimpazların sıylıqlaw máresimi bolsa 7-aprel kúni rayon hákimligi tárepinen ótkeriliwi rejelestirilgen.
Qońırat rayonı hákimi olimpiadası sheńberindegi sport ilajları izbe-iz dawam etpekte.
Qońırat rayonı hákimligi málimleme xızmeti