Miynet nızamshılıǵında hayal-qızlardıń huqıqları qanday?
2026-03-26 17:40:00 / Министрлик
- Úsh jasqa tolmaǵan balaları bar, byudjet esabınan qarjılandırılatuǵın mákeme hám shólkemlerde islep atırǵan hayal-qızlarǵa jumıs waqtınıń háptesine 35 saattan aspaytuǵın qısqartılǵan múddeti belgilenedi.
- On eki jasqa tolmaǵan eki hám onnan aslam balası yamasa on altı jasqa tolmaǵan mayıplıǵı bolǵan balası bar hayallarǵa hár jılı miynet haqı saqlanǵan halda tórt kalendar kúnnen kem bolmaǵan múddet penen qosımsha dem alıs beriledi.
- On eki jasqa tolmaǵan eki hám onnan aslam balası yamasa on altı jasqa tolmaǵan mayıplıǵı bolǵan balası bar hayallarǵa olardıń qálewine bola, hár jılı on tórt kalendar kúnnen kem bolmaǵan múddet penen miynet haqısı saqlanbaǵan halda dem alıs beriledi.
Hayalǵa, onıń qálewine bola, balası úsh jasqa tolǵanǵa shekem balanı tárbiyalaw ushın is haqısı saqlanbaǵan qosımsha dem alıs ta beriledi. Bala tárbiyalaw dem alısları dáwirinde hayaldıń jumıs ornı (lawazımı) saqlanadı.
Bul dem alıslar miynet stajına, biraq barlıǵı bolıp kóbi menen altı jıl, sonday-aq qánigeligi boyınsha jumıs stajına da qosıladı. Eki jasqa tolmaǵan eki hám onnan artıq balaları bolǵan jaǵdayda, dem alıstıń múddeti keminde bir saat etip belgilenedi. Balanı awqatlandırıw ushın beriletuǵın tánepkiler jumıs waqtına kirgiziledi hám ortasha aylıq miynet haqı esaplanadı. Balası bar hayaldıń qálewine bola, balanı awqatlandırıw ushın beriletuǵın tánepkiler dem alıw hám awqatlanıw ushın belgilengen tánepiske qosıp beriliwi yamasa ulıwmalastırılıp, jumıs kúniniń (jumıs smenasınıń) basına yamasa aqırına kóshirilip, jumıs kúni (jumıs smenası) soǵan muwapıq qısqartılıwı múmkin.
Hayallarǵa jetpis kalendar kún hámiledarlıq hám tuwıwdan keyin eliw altı kalendar kún (tuwıw qıyın bolǵan yamasa eki hám onnan artıq bala tuwılǵan jaǵdaylarda - jetpis kalendar kún) múddeti menen hámiledarlıq hám tuwıw dem alısları berilip, mámleketlik sociallıq qamsızlandırıw boyınsha napaqa tólenedi. Hámiledarlıq hám tuwıw dem alısı tuwıwǵa shekem ámelde bunday dem alıstıń neshe kúninen paydalanılǵanına qaramastan hayalǵa tolıq beriledi.
- Hámiledar hayallar hám úsh jasqa tolmaǵan balası bar hayallar menen dúzilgen miynet shártnamasın jumıs beriwshiniń baslaması menen biykar etiwge jol qoyılmaydı, kárxananıń pútkilley saplastırılıwı buǵan kirmeydi, bunday jaǵdaylarda miynet shártnaması olardı májbúriy jumısqa jaylastırıw shárti menen biykar etiledi. Bul hayal-qızlardı jumısqa jaylastırıwdı jergilikli miynet uyımı olardı jumısqa jaylastırıw dáwirinde nızam hújjetlerinde belgilengen tiyisli sociallıq tólemler menen támiyinlegen halda ámelge asıradı.
Hámiledar hayallardı hám on tórt jasqa tolmaǵan balası (on altı jasqa tolmaǵan mayıp balası) bar hayallardı olardıń kelisimisiz túngi jumıslarǵa, jumıstan tısqarı jumıslarǵa, dem alıs kúnlerindegi jumıslarǵa tartıwǵa hám xızmet saparına jiberiwge jol qoyılmaydı.
Hámiledar hayaldıń, on tórt jasqa tolmaǵan balası (on altı jasqa tolmaǵan mayıp balası) bar hayaldıń, sonday-aq qáwenderliginde sonday balası bar hayaldıń yamasa shańaraqtıń biytap aǵzasın kútiw menen bánt bolǵan shaxstıń ótinishine bola, jumıs beriwshi medicinalıq juwmaqqa muwapıq olarǵa tolıq emes jumıs kúni yamasa tolıq emes jumıs háptesi belgilewi kerek.
Qońırat rayonı ádillik bólimi
Mámleketlik xızmetler orayı bólim baslıǵı: E.Bekeshov