Qaraqalpaqstan Respublikası Qońırat rayonı hákimligi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev isbilermenlikti rawajlandırıw, jańa jumıs orınların jaratıw arqalı xalıqtıń abadan turmısın támiyinlew baǵdarında ámelge asırılıp atırǵan jumıslar menen tanısıw maqsetinde Qońırat rayonında boldı.

Dáslep, Joqarǵı Keńes Baslıǵı «Elabad» máhállesindegi «Ustyurt star biznes» kárxanası tárepinen kir juwıw materialların islep shıǵarıw joybarı menen jaqınnan tanıstı. Isbilermenniń ónimlerin tek ǵana ishki bazarǵa emes, eksportqa da baǵdarlaw ilajların kóriw boyınsha juwapkerlerge tapsırmalar berildi.

Bunnan soń, «Almazar» máhállesinde isbilermen X.Allaniyazov tárepinen tazalanǵan suw islep shıǵarıw hám qaǵazdı qayta islew joybarı, «Café Collection» kárxanası tárepinen jolǵa qoyılǵan tigiw hám trikotaj ónimlerin islep shıǵarıw joybarı, «Hákim ata» máhállesindegi Majit Atamuratov tárepinen mebel islep shıǵarıw joybarı jumısları barıp kórildi. 

Sonday-aq, «ASQARTAY-AMINTAY» shańaraqlıq kárxanası tárepinen qolǵap islep shıǵarıw, jeke tártiptegi isbilermenlerden Majitov Murat tárepinen shulıq islep shıǵarıw, Seytmuratov Samat tárepinen imaratlar fasadı ushın termopanel islep shıǵarıw, ónerment Esemuratov Serik tárepinen saz ásbapların islep shıǵarıw joybarları kózden ótkerildi.

Bunnan soń, grant qarjıları tiykarında úskeneler alıp kelingen «Kardio Kungrad» kárxanası, jáne bir qatar isbilermenlik joybarlarınıń barısı úyrenildi hám isbilermenlerdi qollap-quwatlaw, olardıń óz jumısın keńeytiwi ushın jaqınnan járdem beriw boyınsha juwapkerlerge anıq tapsırmalar berildi.

Joqarǵı Keńes Baslıǵı rayonda ámelge asırılıp atırǵan jumıslar menen tanısıw barısında renovaciya tiykarında qurılıp atırǵan kóp qabatlı úylerdiń qurılısı, sonday-aq, «Jińishke» kanalı boyında ámelge asırılıp atırǵan jaǵalıq boyı xızmetlerin shólkemlestiriw jumısların barıp kórdi. Qurılıs jumısların óz waqtında, sapalı etip juwmaqlaw boyınsha tapsırmalar berildi.

@joqargikenes