Qońırat rayonında jańa mektep paydalanıwǵa tapsırıldı
2026-03-19 19:45:00 / Министрлик
Qońırat rayonında Nawrız bayramı hám múbárek Ramazan hayıtı aldınan jáne bir áhmiyetli sociallıq obyekt - ulıwma bilim beriw mektebiniń jańa imaratı paydalanıwǵa tapsırıldı.
"Hákim ata" mákan puqaralar jıyını aymaǵında jaylasqan 16-sanlı ulıwma bilim beriw mektebiniń saltanatlı ashılıw máresiminde keń jámiechilik wákilleri, muǵallimler, oqıwshılar hám juwapker shólkemler qatnastı.
Bul zamanagóy bilimlendiriw orayı Ózbekstan Respublikası Prezidentiniń 2024-jıl 24-dekabrdegi "2025-2027-jıllarda sociallıq hám óndirislik infrastrukturanı rawajlandırıw ilajları haqqında"ǵı qararı tiykarında qurıldı.
Joybar sheńberinde qurılǵan bul mektep 330 oqıwshıǵa mólsherlengen bolıp, onda zamanagóy bilim alıw ushın barlıq zárúr sharayatlar jaratılǵan. Sonday-aq, oqıwshılardıń fizikalıq rawajlanıwın támiyinlew maqsetinde 12x24 ólshemdegi zamanagóy sport zalı da qurıp pitkerildi.
Ilaj dawamında shıǵıp sóylegenler tárepinen bilimlendiriw sistemasın rawajlandırıw, jaslar ushın zamanagóy sharayatlar jaratıw mámleketlik siyasattıń tiykarǵı baǵdarlarınan biri ekeni ayrıqsha atap ótildi.
Jańa mekteptiń paydalanıwǵa tapsırılıwı aymaq xalqı, ásirese, jaslar ushın Nawrız bayramı aldınan múnásip sawǵa boldı.
Qánigelerdiń atap ótiwinshe, bunday zamanagóy bilimlendiriw mákemeleri keleshek áwladtıń bilimli, bárkamal bolıp kamalǵa keliwinde ayrıqsha áhmietke iye.
Qońırat rayonı hákimligi Málimleme xızmeti