"Jaslar dápteri" qorınan sociallıq járdemler kórsetiwdi jetilistiriwge qaratılǵan qararına ózgerisler hám qosımshalar kirgizildi
2026-03-10 09:00:00 / Министрлик
Húkimet qararı (78-san, 25.02.2026-jıl) menen Ministrler Kabinetiniń 2022-jıl 7-iyundaǵı 312-sanlı qararına ózgerisler hám qosımshalar kirgizildi.
Oǵan bola, "Jaslar dápteri"ne turaqlı yamasa waqtınsha jasaw ornına bola, 14 jasqa tolǵan hám 30 jastan aspaǵan (31 jasqa tolmaǵan) tómendegi kategoriyadaǵı jaslar kirgiziledi:
Sociallıq reestrge kirgizilgen shańaraqlardıń aǵzaları;
shańaraǵınıń aylıq dáramatı shańaraq aǵzalarınıń hár birine minimal tutınıw qárejetleri muǵdarınıń 2 esesinen kóp bolmaǵan.
Arza beriwshi "Jaslar dápteri"ne kiriw hám sociallıq járdemlerden birin kórsetiwdi sorap mámleketlik xızmetler orayı, BIMXP (my.gov.uz) yamasa Jaslar birden-bir elektron platforması arqalı múrájat etedi.
"Jaslar dápteri" qorınan kórsetiletuǵın járdemler individual rejelerge muwapıq sociallıq shártnama dúziw arqalı beriledi.
Sociallıq shártnama shártleriniń orınlanıwı Jaslar birden-bir elektron platforması arqalı avtomatikalıq tárizde monitoring etiledi.
Monitoring procesinde sociallıq shártnamada belgilengen hár bir shárttiń orınlanıwı hár ayda 100 ballıq sistemada bahalanadı.
Barlıq shártler boyınsha toplanǵan ballardıń ulıwma jıyındısın shártler sanına bóliw arqalı ortasha kórsetkish anıqlanadı.
Keminde 6 ay dawamında turaqlı sociallıq shártnama shártlerin "ayrıqsha" dárejede orınlaǵan, ortasha aylıq kórsetkishleri eń joqarı bolǵan 1 000 ǵa shekem jaslar hár jılı dekabr ayında BEMniń 3 esesi muǵdarında aqshalay sıylıqlanadı.
Qońırat rayonı ádillik bólimi
XBM aǵa qánigesi I.Tursınbaev