Qaraózekte "Doslıq festivalı" sheńberinde jaslar menen ushırasıw bolıp ótti
2026-11-18 19:40:00 / Jańalıqlar

Qaraózek rayonında Namangan mámleketlik texnika universiteti rektorı, ximiya ilimleriniń doktorı, professor O. Ergashev hám universitettiń Jaslar máseleleri hám ruwxıy-aǵartıwshılıq isleri boyınsha prorektorı M. Qayumovlardıń qatnasıwında belsendi jaslar menen ushırasıwı shólkemlestirildi.
Ushırasıw "Doslıq festivalı" sheńberinde ótkerilip, onda jaslardıń bilim alıwı, ilimge bolǵan qızıǵıwshılıǵın arttırıw, talant hám potencialın júzege shıǵarıw, keleshektegi maqset hám umtılısların qollap-quwatlaw máselelerine ayrıqsha itibar qaratıldı.
Ushırasıw dawamında jaslar ózlerin qızıqtırǵan sorawlar menen múrájat etip, usınıs hám pikirlerin bildirdi.
"Doslıq festivalı" sheńberi juwmaǵında miymanlar rayonda ámelge asırılıp atırǵan "Jasıl mákan" ulıwma milliy joybarı sheńberinde nál egiw ilajında da belsene qatnastı.
Miymanlar rayon belsendileri hám jaslar menen birgelikte nál egip, qorshaǵan ortalıqtı abadanlastırıw, ekologiyalıq ortalıqtı jaqsılaw hám keleshek áwlad ushın jasıl hám taza tábiyattı qásterlep saqlawǵa óz úlesin qostı.
Bul iygilikli baslama tek ǵana tábiyatqa mehir hám itibar emes, al jaslardıń qálbinde ekologiyalıq mádeniyat hám Watanǵa sadıqlıq sezimlerin bekkemlewge de xızmet etedi.
Qaraózek rayonı hákimligi málimleme xızmeti






