Densawlıqtı saqlaw sistemasın reformalaw boyınsha jańa ilajlar haqqında málimleme berildi

Búgingi kúnde elimizde baslanǵısh medicinalıq-sanitariyalıq járdem kórsetiwdiń xalıqaralıq tájiriybege tiykarlanǵan hám medicinanı xalıqqa jaqınlastırıwǵa qaratılǵan jańa modelin engiziwge ayrıqsha itibar qaratılmaqta. Usı tiykarda kóp tarmaqlı oraylıq poliklinikalar, shańaraqlıq shıpakerlik punktleri hám shańaraqlıq poliklinikalar, máhálle medicina punktleri birden-bir qatnas tiykarında rawajlandırılmaqta.

Bunıń nátiyjesinde shańaraqlıq shıpakerlerdiń úlesin 70 procentke jetkeriw mólsherlengen. Sanlastırıw hám qaǵaz hújjet aylanısın qısqartıw arqalı medicina xızmetkerleriniń jumıs júklemesin derlik úshten bir bólimge azaytıw, puqaralardıń baslanǵısh buwın xızmetlerinen qanaatlanıw dárejesin 85 procentten arttırıw maqset etilgen. Sonıń menen birge, medicina xızmetkerlerin materiallıq xoshametlewdiń olardıń kásiplik nátiyjeliligine tikkeley baylanıslı bolatuǵın jańa sisteması engizilmekte.

Prezidentimiz qánigelesken járdemdi túp-tiykarınan jetilistiriw áhmiyetli ekenligin atap ótti. Elimizde onlaǵan ilimiy-ámeliy medicina orayları bolıp, olar zamanagóy ásbap-úskeneler menen támiyinlenbekte, byudjetten úlken qarjı ajıratılmaqta.
Sonıń menen birge, xalıq arasında xızmet sapası hám uzın náwbetler boyınsha narazılıqlar saqlanıp qalmaqta. Qánigelestirilgen oraylarda emlewdiń xalıqaralıq standartların engiziw, baslanǵısh buwında metodologiyalıq jumıslardıń tómen ekenligi kórsetip ótildi.

Sol sebepli, barlıq respublikalıq qánigelestirilgen klinikalardıń jumısın qayta kórip shıǵıp, olardıń basqarıwına zamanagóy, professional menedjerlerdi tartıw usınısı bildirildi. Túrkiyalı qánigeler jumıs alıp barıp atırǵan Respublikalıq onkologiya hám radiologiya orayı oǵan ayqın mısal bola aladı.

Házirgi waqıtta klinikalıq protokollardı qayta kórip shıǵıw hám jańalaw dawam etpekte: házirge shekem 400 i qayta kórip shıǵıldı, jıldıń aqırına shekem bul kórsetkish eki esege artadı. Aziya rawajlanıw bankiniń járdeminde 3 mıńnan aslam medicinalıq xızmetler ushın tarifler metodologiyası islep shıǵılmaqta.

Mámleketimiz basshısı jáne bes orayǵa sırt elli professional menedjerlerdi tartıw yamasa olardı sırt eldegi abıraylı klinikalardıń basqarıwına beriw imkaniyatın úyreniwge tapsırma berdi.

Onda xalıqaralıq tájiriybe tiykarında diagnostika hám emlew standartları islep shıǵılıwı, milliy klinikalıq protokollar jaratılıwı, jańa texnologiyalar engiziliwi, oraylardı rawajlandırıw boyınsha uzaq múddetli strategiya islep shıǵılıwı, joqarı mamanlıqtaǵı qánigeler tartılıwı, xalıqqa sapalı medicinalıq járdem kórsetiwdiń ashıq-aydın hám ádil sisteması jaratılıwı shárt ekenligi atap ótildi.
Májiliste balalardıń salamatlıǵın qorǵaw ilajları da dodalandı.

Atap ótilgenindey, pútkil jer júzinde balalardı ana súti menen awqatlandırıw mashqalası áhmiyetli bolıp, ana sútiniń ornın basatuǵın ónimlerden paydalanıw páti artıp barmaqta.

2030-jılǵa shekem Jáhán densawlıqtı saqlaw shólkemi tárepinen usınıs etilgen kórsetkish – 6 ayǵa shekemgi balalardıń 70 procenti tek ǵana ana súti menen awqatlandırılıwına erisiw maqsetinde mámleketimizde ana súti menen awqatlandırıwdı qollap-quwatlaw milliy baǵdarlaması tastıyıqlanadı.

Baǵdarlama sheńberinde JDSSh hám YuNISEFtiń “Ana súti menen emiziw ushın qolaylı sharayat jaratıwshı medicina mákemesi” hám “Ana súti menen tabıslı emiziwge qaray 10 qádem” baslamaları engiziledi. Medicina xızmetkerlerin ana súti menen awqatlandırıw boyınsha oqıtıw, hámiledar hayallar hám analardıń bilimin arttırıw ilajları ótkeriledi.

Nızamshılıqqa ana sútiniń ornın basatuǵın ónimlerdiń reklamasın sheklewge qaratılǵan ózgerisler kirgiziw, sonday-aq, balalar ushın mólsherlengen azıq-awqat ónimlerin islep shıǵarıw, import hám eksport etiw, tasıw, saqlaw, satıw hám jetkerip beriwge baylanıslı talaplar menen standartlardı jetilistiriw usınıs etildi.

Prezidentimiz bildirilgen usınıslardı maqullap, medicinanı xalıqqa jaqınlastırıw hám sapasın arttırıw, juqpalı bolmaǵan keselliklerden ólimshilikti azaytıw, jas áwlad salamatlıǵın bekkemlew boyınsha bir qatar tapsırmalar berdi.