Санлы технологияларды раӯажландырыӯ режелери көрип шығылды

«Өзбекстан – 2030» стратегиясында мәмлекетимизди регионаллық «IT-НUB»ға айландырыӯ ӯазыйпасы белгиленген. Усы мақсет жолында санлы технологиялар басқышпа-басқыш раӯажландырып келинбекте. Барлық аймақларда IT –парклер қурылып, бул тараӯда оқыӯ ҳәм ислеӯ  ушын имканият кеӊейди. Интернет тезлиги ҳәм қамтып алыныӯы артты. 190 мыӊнан аслам адам жумыслы болды.

Соӊғы жылларда тараӯда 3 миллиард доллар инвестициялар өзлестирилген. Сырт елли капиталдыӊ қатнасыӯындағы кәрханалардыӊ саны 2017-жылға салыстырғанда 8,5 есеге өсип, олардыӊ саны  мыӊнан артқан. Бүгин тараӯ ӯәкиллериниӊ ҳәр оннан биреӯи  усындай халықаралық кәрхана. Сондай-ақ, жети жыл алдын 12 экспортшы кәрхана болған болса, быйыл 650 болды. Жыл жуӯмағы менен мәлимлеме технологиялары ҳәм байланыс хызметлериниӊ экспорты 900 миллион доллардан артады.

Турмыстыӊ түрли тараӯларында жасалма ителлектти қолланыӯ кеӊеймекте. Усындай технология тийкарында 20дан аслам жойбарлар иске қосылды. Тармақ ҳәм ири кәрханалар  бойынша және 70 жойбар ислеп шығылды. Жасалма интеллектке таярлық халықаралық индексте Өзбекстан 17 текшеге көтерилди.

Бул бағдарға итибардыӊ даӯамы сыпатында, Өзбекстан Президентиниӊ усы жыл 14-октябрьдеги қарары менен Жасалма интеллект технологияларын 2030-жылға шекем раӯажландырыӯ стратегиясы қабыл етилди.  Онда жасалма интеллектке тийкарланған  программалық өнимлер ҳәм хызметлердиӊ үлесин көбейтиӯ, техникалық инфраструктураны кеӊейтиӯ, кадрлардыӊ потенциалын арттырыӯ сыяқлы бир қатар илажлар белгиленген.

Презентацияда санлы технологиялар министри келеси жылға мөлшерленген режелер ҳаққында мәлимлеме берди.

Соныӊ ишинде, Бухара, Ферғана ҳәм Ташкент ӯәлаятларында «бултлы» мағлыӯматлар орайы  иске қосылды. Стартапларға шараят жаратыӯ ушын Ташкент мәлимлеме технологиялары ҳәм Инха университетлеринде жасалма интеллект бойынша лабораториялар  ашылады. Мәмлекетлик уйымлардыӊ 3 мыӊ хызметкери, ҳәкимлер ҳәм орынбасарларыныӊ бул бағдарда маманлығы арттырылады.

Жуӯапкерлерге жасалма интеллект тийкарында ислейтуғын жойбарлардыӊ санын 100ге, программалық  өнимлер ҳәм хызметлердиӊ көлемин  50 миллион долларға жеткериӯ ӯазыйпасы қойылды.

Тармақ кәрханаларында басланған трансформация унамлы нәтийже бермекте. Усы жылдыӊ өзинде телекоммуникация хызметлериниӊ көлеми 16 процентке артып, 21 триллион сумға жеткен. «Өзбектелеком» компаниясыныӊ дәраматы 9 триллион сумнан артқан.

Енди келеси жыл басқарыӯды толық санластырып, қәрежетлерди жумсаӯ, экологиялық, социаллық ҳәм корпоратив басқарыӯ принциплерин енгизип, халықаралық рейтингти алыӯ зәрүрлиги атап өтилди.

«Өзбекстан почтасы» системасында да өзгерис бар. Быйыл түсимлер 1,4 есеге, экспорт 20 процентке артқан. Жаӊа түрдеги хызметлердиӊ енгизилгени нәтийжесинде  жөнетпелердиӊ саны 50 процентке көбейген.

Режеге бола, келеси жыл 1 мыӊ 600 почта бөлмесинде электрон коммерциялық өнимлерди тапсырыӯ  жолға қойылады. Санлы сайланды орайы ашылып, бундай товарлар ҳәм почта жөнетпелерине ислеӯ бериӯдиӊ сапасы жақсыланады. Бул мақсетлер ушын Европа  тиклениӯ ҳәм раӯажланыӯ банкинен қаржы тартылады.

Тараӯ ушын әҳмийетли тийкар – телекоммуникациялар ҳаққындағы нызам жаӊа редакцияда  қабыл етилди. Енди оған сүйенип, барлық тармақ ҳәм аймақлар кесиминде санластырыӯ бойынша еки жыллық бағдарлама ислеп шығылатуғыны белгиленди.

Соныӊ ишинде, келеси  жылы 6 мыӊ жаӊа таяныш станция қурылады. 30 мыӊ километр оптикалық талшықлы кабельлер тартылып, қамтып алыныӯы  98 процент болады. Тараӯ экспортын 1,2 миллиард долларға жеткериӯ илажлары көриледи.

Мәмлекетимиз басшысыныӊ басламасы менен шөлкемлестирилип атырған Санлы технологиялар  халықаралық орай ҳаққындағы режениң ислеп шығылыӯы тараӯдыӊ раӯажланыӯы ушын және бир үлкен жаӊалық болады. «Enterprise Uzbekistan» атамасындағы бул орайда «инглис ҳуқықы» принциплери, капиталдыӊ еркин ҳәрекети, халықаралық стандарттағы мийнет қатнасықлары, сырт елли банк филиаллары жолға қойылмақта.

Презентацияда  жасалма интеллектке байланыслы нызам тийкарларын жаратыӯ, санлы технологиялар тараӯында билимлендириӯди раӯажландырыӯ бойынша көрсетпелер берилди.