Densawlıqtı saqlaw tarawındaǵı iri investiciyalıq joybarlarınıń barısı kórip shıǵıldı

Házirgi waqıtta densawlıqtı saqlaw tarawında 2,7 milliard dollarlıq 35 investiciyalıq joybardan ibarat portfel qáliplestirilgen. Olar jańa qánigelestirilgen oraylardı hám kóp tarmaqlı emlewxanalardı qurıw, bar medicina mákemelerin úskenelew hám zamanagóy kadrlar tayarlawdı óz ishine aladı.

Jańa medicina mákemelerin qurıw hám barların modernizaciyalawda olardıń jaylasıwı, quwatlılıǵı hám xızmet túrleri xalıqtıń talabına say bolıwı áhmiyetli. Prezentaciyada usı tiykarda investiciyalıq joybarlardı qáliplestiriw, olarǵa jeke menshik sektordı tartıw, medicina mákemelerin basqarıwdıń jańa usılların engiziw máselelerine itibar qaratıldı.

Atap aytqanda, Milliy onkologiya orayı, Respublikalıq nevrologiya hám insult orayı, Tashkent wálayatında jası úlkenler ushın kóp tarmaqlı medicina orayı, Qashqadárya wálayatında jańa emlewxanalar jáne Nókis qalasındaǵı analar hám balalar orayın qurıw, Termiz qalasında medicinalıq bilimlendiriw baǵdarlamaların jolǵa qoyıw, mámleketlik-jeke menshik sheriklik modeli tiykarında Samarqand qalasında 800 orınlıq emlewxana, Buxara wálayatında kóp tarmaqlı medicina mákemesin shólkemlestiriw rejelestirilgen.

Prezentaciyada usı joybarlar sheńberinde ámelge asırılıp atırǵan jumıslardıń barısı haqqında maǵlıwmat berildi.

Bunnan tısqarı, ulıwma bahası 1 milliard dollar bolǵan toǵız perspektivalı joybar boyınsha usınıslar qáliplestirilgen. Olar nevrologiya hám insult, ruwxıy salamatlıq hám narkologiya xızmetleri, balalar onkologiyası hám gematologiyası infrastrukturasın rawajlandırıw, qıstawlı medicinalıq járdemdi jetilistiriw, onıń avtoparkin jańalaw hám medicina kadrların tayarlawdı qamtıp aladı.

Keleshekte medicinaǵa investiciya tartıw densawlıqtı saqlaw infrastrukturasınıń master-rejesi menen baylanısadı. Usı tiykarda 2040-jılǵa shekem mólsherlengen investiciya strategiyasın islep shıǵıw usınıs etildi. Bárinen burın, ámeldegi joybarlar xatlawdan ótkerilip, olardıń áhmiyetliligi hám ámelge asırıw imkaniyatları bahalanadı. Keyin aymaqlardıń talabına say joybarlar tańlanıp, olardıń investiciyalıq pasportları hám birden-bir portfeli qáliplestiriledi. Strategiya jeke menshik investorlar, xalıqaralıq finans institutları hám donorlar menen islesiwde tiykarǵı baǵdarlardı belgilep beredi.

Medicina mákemeleriniń jumısına jeke menshik sektordı tartıwdıń áhmiyetli baǵdarı – autsorsing. Kelesi jıldan ámel etetuǵın jańa tártipke bola, mákemeler ayırım medicinalıq hám járdemshi xızmetlerdi jeke menshik shólkemlerden satıp alıwı múmkin boladı. Onda xızmet kórsetiwshi menen uzaq múddetli shártnama dúziw, xızmettiń kólemin hám sapasın aldınnan belgilew, nátiyjeni anıq ólshemler tiykarında bahalaw usınıs etilmekte. 2030-jılǵa barıp xızmetlerdi satıp alıwda autsorsingtiń úlesin 30 procentke jetkeriw maqset etilgen.

Bul processti ashıq-aydın júrgiziw ushın “Medicinalıq autsorsing” elektron sistemasın engiziw rejelestirilgen. Onda xızmetler, orınlawshılar hám shártnamalardıń birden-bir reestri júrgizilip, kórsetilgen xızmettiń kólemi, sapası hám tólemler baqlap barıladı.

Sistemanı mámleketlik satıp alıwlar menen baylanıstırıw da názerde tutılmaqta.

Iri medicinalıq shólkemlerge professional basqarıwshılardı tartıw máselesi de dodalaw orayında boldı. Olardı ashıq tańlaw tiykarında tańlap alıw hám jumısın hár jılı belgilengen nátiyje kórsetkishleri boyınsha bahalaw názerde tutılǵan. 2030-jılǵa shekem bes iri mákemede usınday basqarıwdı jolǵa qoyıw rejelestirilmekte.

Mámleketimiz basshısı tarawdıń investiciyalıq strategiyası hám usınılǵan joybarlardı master-reje tiykarında puqta islep shıǵıw, ámeldegi joybarlardı jedellestiriw boyınsha juwapkerlerge kórsetpeler berdi.