Bilimlendiriw hám ilim ministrliginiń jumısın shólkemlestiriw boyınsha usınıslar kórip shıǵıldı

Jaqında Prezidentimizdiń pármanı menen Mektepke shekemgi hám mektep bilimlendiriwi ministrligi jáne Joqarı bilimlendiriw, ilim hám innovaciyalar ministrligi birden-bir Bilimlendiriw hám ilim ministrligi sıpatında qayta shólkemlestirildi. Bunnan gózlengen maqset bilimlendiriw, tárbiya hám ilimniń bir pútin sistemasın qáliplestiriw, bilimlendiriwdiń sapasın hám nátiyjeliligin arttırıw, insan kapitalın rawajlandırıw jumısların jańa basqıshqa alıp shıǵıw bolıp tabıladı.

Jańa ministrliktiń aldına mektepke shekemgi bilimlendiriwden joqarı bilimlendiriwge shekemgi basqıshlar hám ilimiy jumıs arasındaǵı izbe-izlikti támiyinlew, sistemanı birden-bir qatnas tiykarında basqarıw wazıypası qoyılǵan. Onda bilimlendiriwdiń mazmunın zaman hám miynet bazarınıń talaplarına beyimlestiriw, básekini rawajlandırıw, jeke menshik sektordıń qatnasın keńeytiw hám tarawdıń jámiyetshilik aldındaǵı esap beriwin arttırıw úlken áhmiyetke iye.

Prezentaciyada jańa ministrliktiń jumısın orınlardaǵı haqıyqıy jaǵdayǵa súyenip shólkemlestiriw, tákirarlanatuǵın wazıypalardı qısqartıw hám aymaqlıq buwınlardıń juwapkershiligin kúsheytiw máseleleri kórip shıǵıldı. Basqarıwdı sanlastırıw hám analitikalıq potencialdı arttırıw qararlardı isenimli maǵlıwmatlar tiykarında qabıl etiwge xızmet etetuǵını atap ótildi.

Mektepke shekemgi bilimlendiriwde balanı hár tárepleme rawajlandırıw, baǵdarlama hám metodikalardı jańalaw jáne tárbiyashılardıń mamanlıǵın arttırıwǵa itibar qaratıldı. Sonday-aq, balalardıń qızıǵıwshılıǵı menen qábiletin erte anıqlaw, bilimlendiriw mákemelerinde zamanagóy sharayatlardı jaratıw boyınsha usınıslar bildirildi.

Mektep bilimlendiriwinde sabaqlıqlardı jańalaw, oqıwshılardıń bilim hám ámeliy kónlikpelerin izbe-iz rawajlandırıw jáne olardı bahalaw sistemasın jetilistiriw máseleleri dodalandı. Pedagoglarǵa metodikalıq járdem kórsetiwde jasalma intellektten paydalanıw, ayırım mekteplerde inglis tilinde bilim beriw tájiriybesin ótkeriw hám jeke menshik sektordıń qatnasın keńeytiw usınıs etildi.

Kásiplik bilimlendiriw boyınsha jaslardıń qızıǵıwshılıqların erte anıqlaw, texnikumlardıń baǵdarlamaların miynet bazarınıń talaplarına beyimlestiriw hám olardıń materiallıq bazasın bekkemlewge ayrıqsha áhmiyet berildi. Kárxanalar menen birgelikte dual bilimlendiriwdi keńeytiw, xalıqaralıq baǵdarlamalar hám zamanagóy oqıw materialların engiziw máseleleri kórip shıǵıldı.

Joqarı bilimlendiriwde universitetlerdiń erkinligin keńeytiw, basqarıwdıń sapasın hám basshılardıń nátiyje ushın juwapkershiligin arttırıw usınıs etildi. Sonıń menen birge, jetekshi sırt el joqarı oqıw orınları menen birge islesiwdi rawajlandırıw, bilimlendiriwdi óndiris penen jaqınlastırıw hám studentlerdiń ámeliy tayarlıǵın kúsheytiw máseleleri dodalandı.

Ilim tarawında ilimiy klasterlerdi rawajlandırıw, universitetler, laboratoriyalar hám kárxanalar arasındaǵı birge islesiwdi bekkemlewge itibar qaratıldı. Ilimiy qollanbalardı ámeliyatqa engiziw hám olardıń tiykarında jańa ónimlerdi hám kárxanalardı jaratıw boyınsha usınıslar berildi.

Prezentaciya dawamında Prezidentimiz bilimlendiriwdiń baqshaǵa shekemgi barlıq basqıshları birden-bir vertikal sıpatında islewi, ásirese, mektep hám universitet arasındaǵı izbe-izliktiń bekkemleniwi zárúr ekenligin atap ótti. Hár bir basqıshta bilimlendiriwdiń sapasına itibardı kúsheytiw, balalardı milliy hám ulıwma insanıylıq qádiriyatlar ruwxında tárbiyalaw hám bul qádiriyatlarǵa pútkil bilimlendiriw procesinde hám ilimiy jumısta súyeniw áhmiyetli ekenligi atap ótildi. Sonday-aq, ilimiy izertlewlerdiń nátiyjelerin ámeliyatqa engiziwge ayrıqsha itibar qaratılıp, rektorlar óz universitetiniń jaqın hám orta múddetli keleshekte qalay rawajlanıwı haqqında anıq túsinikke hám rejesine iye bolıwı kerek ekenligi kórsetip ótildi.

Juwapkerlerge usınıslardı puqta islep shıǵıw tapsırıldı.