Transport-logistika tarawındaǵı iri joybarlardıń barısı kórip shıǵıldı

Elimiz ekonomikasınıń jedel ósiwi, sanaat óndirisiniń hám sırtqı sawda kóleminiń keńeyiwi transport infrastrukturasın izbe-iz rawajlandırıwdı talap etpekte. Ózbekstandı Tınısh okeanınan Evropaǵa shekemgi eń qısqa qurǵaqlıq koridorınıń tiykarǵı buwınına aylandırıw, xalıqaralıq bazarlarǵa shıǵıw imkaniyatların keńeytiw bul baǵdardaǵı tiykarǵı wazıypalardan bolıp esaplanadı.

2030-jılǵa shekem transport xızmetleriniń kólemin eki esege arttırıw, tarawǵa 9,1 milliard dollarlıq investiciya tartıw hám xızmetler eksportın 5,7 milliard dollarǵa jetkeriw rejelestirilgen. Prezentaciyada usı maqsetlerge erisiw ushın ámelge asırılıp atırǵan infrastrukturalıq joybarlar, olardıń múddetleri hám sheshiliwi kerek bolǵan máseleler kórip shıǵıldı.

Bárinen burın, aeroportlardıń qurılısı hám modernizaciyası boyınsha málimleme berildi.

Tashkent hám Buxarada ulıwma bahası derlik 3 milliard dollar bolǵan jańa aeroport komplekslerin qurıw jumısları alıp barılmaqta. Jańa Tashkent xalıqaralıq aeroportı dáslepki basqıshta jılına 20 million jolawshıǵa xızmet kórsetiwge mólsherlengen. Joybar sheńberinde mámleketlik-jeke menshik sheriklik kelisimlerine qol qoyılıp, aymaqtı qurılısqa tayarlaw hám injenerlik tarmaqların kóshiriw jumısları ámelge asırılmaqta.

Jańa Buxara xalıqaralıq aeroportında aerodrom infrastrukturası qurılmaqta. Jolawshı terminalın qurıw hám basqarıwǵa jeke menshik sherikti tartıw boyınsha xalıqaralıq tender ótkerilmekte.

Sonday-aq, Úrgensh, Namangan aeroportların mámleketlik-jeke menshik sheriklik tiykarında, Ándijan aeroportın jeke menshik operatordı tartqan halda modernizaciyalaw joybarlarınıń barısı kórip shıǵıldı. Nátiyjede aeroportlardıń ótkeriwsheńligi artıp, jolawshılarǵa xalıqaralıq standartlar tiykarında xızmet kórsetiw imkaniyatları keńeyedi.

Avtomobil jolları infrastrukturasın rawajlandırıw máselelerine de itibar qaratıldı.
Ótken ayda bahası 2,2 milliard dollar bolǵan Tashkent – Samarqand tólemli avtomobil jolınıń qurılısına start berildi. Úrgensh hám Xiywa qalaların baylanıstırıwshı birinshi tólemli jol iske qosıldı.

Prezentaciyada Tashkent – Samarqand joybarınıń keyingi basqıshların qarjılandırıw, Tashkent – Ándijan hám Tashkent – Bostanlıq tólemli jolları boyınsha investorlardı anıqlaw hám ámeliy jumıslardı baslawǵa baylanıslı máseleler dodalandı.
Temir jol tarmaǵınıń ótkeriwsheńligin arttırıw boyınsha usınıslar berildi.

Búgingi kúnde tiykarǵı tranzit jónelislerindegi bir qatar temir jol uchastkaları joqarı júkleme menen islemekte. Sanaat júkleri kóleminiń artıwı hám jańa joqarı tezliktegi poezdlardıń qatnawınıń jolǵa qoyılıwı bar infrastrukturaǵa talaptı jáne de arttıradı.

Sol sebepli, Maqtaaral – Sırdárya, Angren – Pop, Tashgúzar – Baysın – Qumqorǵan, Tashkent – Samarqand hám Toqımashı – Angren jónelislerin modernizaciyalaw ilajları kórip shıǵıldı. Bul jumıslarǵa 200 million dollar qaratıw esabınan uchastkalardıń ótkeriwsheńligin 25-30 procentke arttırıw múmkin ekenligi atap ótildi.

“Qıtay – Qırǵızstan – Ózbekstan” temir jolınıń qurılısı, Tashkent – Samarqand jónelisinde ayrıqsha joqarı tezliktegi temir joldı qurıw, aymaqlardaǵı temir jol tarmaqların keńeytiw hám elektrlestiriw joybarları boyınsha málimleme berildi. Júk vagonları parkin jańalaw, bul processke jeke menshik sektordı keńnen tartıw usınısları da dodalandı.

Xalıqaralıq transport koridorların rawajlandırıw hám teńiz portları arqalı dúnya bazarlarına shıǵıw imkaniyatların keńeytiw máseleleri ayrıqsha kórip shıǵıldı.

Kaspiy teńizindegi Aqtaw, Túrkmenbashı hám Baku, Qara teńizdegi Poti hám Anakliya portlarında Ózbekstannıń qatnasıwında logistika infrastrukturasın jaratıw boyınsha alıp barılıp atırǵan jumıslar tanıstırıldı. Atap aytqanda, Poti portında logistika orayın shólkemlestiriw boyınsha kelisimge qol qoyılǵan, joybardıń texnikalıq-ekonomikalıq tiykarları islep shıǵılmaqta. Anakliya portın rawajlandırıwda, sonday-aq, Túrkiyanıń Samsun hám Stambul portlarına shıǵıwǵa xızmet etetuǵın Naxichevan temir jolınıń qurılısında qatnasıw imkaniyatları úyrenilmekte.

Bul joybarlar toqımashılıq, ximiya, awıl xojalıǵı hám kán-metallurgiya ónimlerin sırtqı bazarlarǵa jetkerip beriw baǵdarların diversifikaciyalawǵa xızmet etedi.

Xalıqaralıq koridorlardan nátiyjeli paydalanıw ushın elimizdegi logistika orayları tarmaǵın da keńeytiw zárúr ekenligi bildirildi.
Xanabad hám Angren qalaları, Yangiywl, Ahangaran, Alat hám Termiz rayonların transport-logistikaǵa qánigelestiriw boyınsha berilgen tapsırmalardıń orınlanıwı boyınsha málimleme berildi. Tashkent qalası, Tashkent, Ándijan, Surxandárya hám Buxara wálayatlarında jámi 17 logistika orayı hám terminal joybarın ámelge asırıw názerde tutılǵan. Olardı jaylastırıw, investorlardı tartıw, qarjılandırıw hám zárúr infrastruktura menen támiyinlew máseleleri dodalandı.

Prezentaciyada júk tasıwlardı sanlastırıw hám tarawda jasırın ekonomikanı qısqartıwǵa ayrıqsha itibar qaratıldı.
Júk tasıw tarawında baqlanbaytuǵın ekonomikanıń úlesi ele de 42 procentten joqarı ekeni kórsetip ótildi. Jergilikli júk transportlarınıń birden-bir reestri, elektron buyırtpalardı qáliplestiriw hám barlıq transport xızmetlerin birlestiretuǵın elektron sistemanıń joq ekenligi bul baǵdardaǵı tiykarǵı mashqalalardan bolıp esaplanadı.

Sonlıqtan, birden-bir sanlı transport sistemasın jaratıw, tasıwshılar reestrin qáliplestiriw, elektron jol qaǵazı hám buyırtpalardı qabıl etetuǵın agregator xızmetin engiziw usınıs etildi. Xalıqaralıq tasıwlarda elektron ruqsatnamalar almasıwın keńeytiw hám júk háreketin real waqıtta baqlaw imkaniyatların jolǵa qoyıw ilajları da kórip shıǵıldı.

Bul arqalı tasıwshılar ushın qolaylıq jaratıw, rásmiy emes xızmetlerdi nızamlı jumısqa ótkeriw hám tarawda ashıq-aydınlıqtı arttırıw názerde tutılǵan.

Mámleketimiz basshısı usınılǵan joybarlardıń múddetleri, qarjılandırıw derekleri hám kútilip atırǵan nátiyjelerin anıq belgilep, olardı óz-ara úylestirilgen halda ámelge asırıw áhmiyetli ekenligin atap ótti. Juwapkerlerge dodalanǵan máseleler boyınsha tiyisli tapsırmalar berildi.