Prezidentimiz Úrgensh xalıqaralıq aeroportındaǵı qurılıs jumısları menen tanıstı

Turistlik potencialdı iske qosıwǵa qaratılǵan baslamalar sheńberinde xalıqaralıq standartlarǵa juwap beretuǵın transport-logistika infrastrukturası jaratılıp atırǵanı itibarǵa ılayıq.

Atap aytqanda, Úrgensh xalıqaralıq aeroportında rásmiy delegaciyalarǵa xızmet kórsetetuǵın terminal qurılıp, jańa aerodrom kompleksin rekonstrukciyalawdıń birinshi basqıshı jedel dawam ettirilmekte.

Prezident Shavkat Mirziyoevtiń Xorezm wálayatına saparı mine, usı joybarlar menen tanısıwdan baslandı.

Aeroport 1960-jılı iske túsken. Oǵan 1992-jılı xalıqaralıq status berilgen. Ulıwma maydanı 285 gektardan aslamdı quraytuǵın bul kompleks ótken jıllar dawamında mıńlaǵan jolawshılarǵa xızmet kórsetip keldi. Búgingi kúnde aeroport arqalı onǵa shamalas abıraylı aviakompaniya tárepinen turaqlı qatnawlar jolǵa qoyılǵan. Usı jıldıń ózinde aeroport tárepinen jámi 126 milliard sumlıq xızmetler kórsetilip, bul kórsetkish 2025-jıldıń usı dáwirine salıstırǵanda 31 procentke ósti.

Jedel rawajlanıp atırǵan zaman, artıp baratırǵan turistler aǵımı hám xalıqaralıq birge islesiw kólemi bar quwatlıqlardı pútkilley keńeytiwdi kún tártibine qoymaqta.

Úrgensh xalıqaralıq aeroportın keńeytiw hám modernizaciyalaw ushın jámi 264 million dollar muǵdarında investiciya qarjıları qaratılǵan. Joybar mámleketlik-jeke menshik sheriklik tiykarında ámelge asırılmaqta.

Joybardıń jeke menshik sherigi sıpatında dúnyanıń eń aldınǵı, joqarı texnologiyalı hám abıraylı aviaciya xablarınan birin basqaratuǵın Qubla Koreyanıń “Incheon International Airport Corporation” kompaniyası tartıldı.

Prezidentimiz Xiywa hám Úrgensh qalaları iri xalıqaralıq sammitler, joqarı dárejedegi diplomatiyalıq ushırasıwlar, abıraylı ekonomikalıq hám mádeniy ánjumanlar ótkeriletuǵın globallıq maydanǵa aylanıp atırǵanın atap ótti. Bunday ilajlarǵa keletuǵın sırt el delegaciyaları ushın joqarı dárejedegi qolaylıq hám qáwipsizlikti támiyinlew mámlekettiń xalıqaralıq maydandaǵı abıray-mártebesine tikkeley xızmet etetuǵını atap ótildi.

Rekonstrukciya sheńberinde aeroportta “Boeing 747” hám “Airbus A350” sıyaqlı keń fyuzelyajlı hawa kemelerin arqayın qabıl etiw imkaniyatı jaratılmaqta. Bul endi dúnyanıń túrli kontinentlerinen Xorezmge tikkeley, tranzitsiz uzaq aralıq párwazlardı ámelge asırıw imkaniyatın beredi.

Sonday-aq, rekonstrukciya jumıslarınıń birinshi basqıshında 18 hawa kemesi turatuǵın orın hám jańa burılıs jolı qurıp pitkeriledi. Bunnan tısqarı, aeroportta zamanagóy shegara qadaǵalawı hám viza bólimleri, ıqsham biznes-zal, hár qıylı sawda hám awqatlanıw shaqapshaları, kúni-túni isleytuǵın medicina punkti jáne dúnya brendlerin jámlegen “Duty free” zonası shólkemlestirilmekte.

Joybar juwmaqlanǵannan soń, jolawshılarǵa xızmet kórsetiw quwatlılıǵı saatına 300 den 1 mıń 300 ge shekem artadı.