Jasalma intellekt ekosistemasın rawajlandırıw boyınsha áhmiyetli wazıypalar belgilendi

Sońǵı jıllarda ámelge asırılǵan jumıslardıń nátiyjesinde Ózbekstan jasalma intellektke tayarlıq boyınsha xalıqaralıq reytingte 25 tekshe joqarılap, 62-orınǵa kóterildi. 2030-jılǵa shekem elimizdi bul reytingte dúnyadaǵı eń aldınǵı 50 mámleket qatarına kirgiziw maqset etilgen.

Sonday-aq, jasalma intellekt tiykarında jaratılǵan baǵdarlamalıq ónim hám xızmetlerdiń kólemin 1,5 milliard dollarǵa jetkeriw, infrastrukturanı keńeytiw jáne 200 den aslam jańa joybardı ámelge asırıw rejelestirilgen.

Mámleketimiz basshısı tarawdaǵı texnologiyalar jedellik penen ózgerip atırǵanın atap ótip, dúnya hám regiondaǵı tendenciyalardı turaqlı tallaw, aldınǵı qollanbalardı jedel ózlestiriw hám jańa baslamalardı alǵa qoyıw zárúr ekenligin atap ótti.
Bárinen burın, prezentaciyada zamanagóy esaplaw infrastrukturasın rawajlandırıw máseleleri kórip shıǵıldı.

Ótken ayda “Sanlı húkimet” data-orayında AQShtıń NVIDIA texnologiyaları tiykarındaǵı superkompyuter iske qosıldı. Ol quwatlıǵı boyınsha dúnya reytinginde 321-orındı iyeledi. Bir ay ishinde klaster júklemesiniń 90 procentke jetkeni elimizde esaplaw quwatlıqlarına talap joqarı ekenin kórsetpekte.

Búgingi kúnge shekem 24 million dollarlıq zamanagóy esaplaw infrastrukturası iske qosıldı. Ámeldegi klasterdi keńeytiw ushın jáne 70 million dollar qaratıw usınıs etildi. Qosımsha qarjılardıń derekleri, zárúr úskenelerdi alıp keliw múddetleri hám Qaraqalpaqstanda sırt el investorları menen birgelikte ámelge asırılıp atırǵan data-oraylardıń joybarları boyınsha málimleme berildi.

Jasalma intellekt sheshimleriniń nátiyjeliligi sapalı maǵlıwmatlar bazasına tikkeley baylanıslı ekenligi atap ótildi. Sonlıqtan, ministrlikler hám uyımlardaǵı bar maǵlıwmatlardı xatlawdan ótkeriw, olardıń tolıqlıǵın, isenimliligin hám óz-ara muwapıqlıǵın támiyinlew, tarawlar kesiminde sapalı maǵlıwmatlar toplamların qáliplestiriw wazıypası qoyıldı.

Usı jıldıń ózinde ekonomika hám sociallıq tarawlarda jasalma intellekt tiykarında ámelge asırılatuǵın joybarlardıń sanın 100 den arttırıw zárúr ekenligi kórsetip ótildi. Medicina, energetika, transport, bajıxana, huqıqıy xızmetler, jámiyetlik qáwipsizlik, ekologiya hám geologiya baǵdarlarında islep shıǵılıp atırǵan sheshimler tanıstırıldı.

Bul baǵdarda IT-Park rezidentleri, startaplar hám 20 dan aslam jasalma intellekt laboratoriyaları menen sistemalı birge islesiwdi jolǵa qoyıw áhmiyetli ekenligi atap ótildi. Usı jılı bul baǵdarda jumıs alıp barıp atırǵan rezidentlerdiń sanın 300 ge, olar tárepinen kórsetiletuǵın xızmetlerdiń kólemin 2 trillion sumǵa, eksporttı bolsa 160 million dollarǵa jetkeriw kútilmekte.

Kadrlar tayarlaw máselesine ayrıqsha itibar qaratıldı. Búgingi kúnge shekem 1,5 millionnan aslam paydalanıwshı jasalma intellekt boyınsha arnawlı sertifikat aldı. Sonday-aq, 900 basshı, 3 mıńnan aslam mámleketlik xızmetker, 1 mıń bank xızmetkeri hám 200 másláhátshiler arnawlı kurslarda oqıtıldı.

Kelesi eki jılda “Bes million jasalma intellekt jetekshileri” joybarın tolıq ámelge asırıw, oqıwshılar, studentler, muǵallimler hám xalıqtıń keń qatlamları ushın zamanagóy oqıw-metodikalıq materiallardı islep shıǵıw wazıypası belgilendi.

Nókis, Samarqand, Termiz, Buxara, Ferǵana, Ándijan, Gúlistan hám Jizzaq qalalarında tarawlıq xakaton hám tańlawlar ótkerildi. “Jasalma intellekt baǵdarında eń jaqsı startap” tańlawına start berildi. Bunday xakatonlardı barlıq aymaqlarda shólkemlestiriw tapsırıldı.

Wálayat, rayon hám qala hákimleriniń jasalma intellekt boyınsha másláhátshileriniń jumısı da dodalandı. 500 talaban arasınan 222 másláhátshi tańlap alınǵan. Bul lawazımlarǵa sırt elde bilim alǵan hám zamanagóy texnologiyalardı puqta iyelegen jas qánigelerdi keńnen tartıw, olardıń jumısın anıq nátiyje kórsetkishleri tiykarında bahalaw zárúr ekenligi atap ótildi.

Másláhátshilerdiń jumısı, ámelge asırıp atırǵan joybarları hám baslamaların monitoring etiw jáne qollap-quwatlawǵa mólsherlengen ayrıqsha sanlı platformanı iske qosıw wazıypası qoyıldı.

Prezentaciyada jasalma intellekt tarawındaǵı xalıqaralıq birge islesiw perspektivaları da kórip shıǵıldı. Bizge belgili, Ózbekstan jaqında WAICO – Jasalma intellekt tarawında birge islesiw boyınsha Pútkil jer júzilik shólkemniń shólkemlestiriwshi mámleketlerden biri sıpatında aǵza boldı.

Endi bul shólkemde qatnasıw arqalı aldıńǵı texnologiyalar, úlken til modellerin hám sanlı transformaciya sheshimlerin mámleketimizde engiziw, sırt elli texnologiyalıq kompaniyalar hám ilimiy mákemeler menen birgeliktegi joybarlardı ámelge asırıw, joqarı maman kadrlar tayarlaw boyınsha jańa baslamalardı alǵa qoyıw zárúr ekenligi atap ótildi.

Prezidentimiz juwapkerlerge esaplaw quwatlıqların izbe-iz arttırıw, tarawlarda ámeliy joybarlardı kóbeytiw, sapalı maǵlıwmatlar bazasın jaratıw, qábiletli jaslar hám startaplardı qollap-quwatlaw jáne xalıqaralıq birge islesiwdi keńeytiw boyınsha anıq tapsırmalar berdi.