Tashkent metropoliteni jumısınıń nátiyjeliligin arttırıw boyınsha usınıslar kórip shıǵıldı

Paytaxt xalqı hám miymanlarınıń sanı artıp atırǵanı, qalanıń keńeyiwi hám jámiyetlik transportqa talaptıń artıwı metropolitenniń rawajlanıwın jańa basqıshqa alıp shıǵıwdı talap etpekte. Usı maqsette 2030-jılǵa shekem metropolitende kúnlik jolawshılardıń sanın 1,8 millionǵa jetkeriw, metro bándirgileriniń sanın 79 ǵa, liniyalardıń uzınlıǵın 103 kilometrge shekem arttırıw maqset etilgen. Sonday-aq, poezdlardıń háreketleniw intervalın basqıshpa-basqısh 1,5-3 minutqa shekem qısqartıw názerde tutılǵan.

Metropoliten infrastrukturasın jaqsılaw hám finanslıq salamatlandırıw boyınsha da bir qatar ilajlar belgilenbekte. Sonıń ishinde, 2026-2028-jıllarda xızmet kórsetiwdiń sapasın arttırıw hám puqaralıq qorǵaw obektleriniń texnikalıq bazasın jetilistiriw ilajları kóriledi.

Jolawshılardıń qáwipsizligin kúsheytiw maqsetinde “Shahriston” metro bándirgisi platformalarında sınaw tárizinde aynalı qorǵaw tosqınlıqların ornatıw usınıs etildi. Xalıqaralıq tájiriybege bola, bunday tosqınlıqlar platformalardaǵı baxıtsız hádiyselerdi 80-90 procentke shekem azaytıw imkaniyatın beredi. Sonıń menen birge, olar qosımsha reklama maydanların jaratıw arqalı dáramatlardı arttırıwǵa da xızmet etedi.

Jáne bir áhmiyetli baǵdar – jańa liniyalardıń qurılısı. Atap aytqanda, “Mingurik – CHilanzar buyım bazarı” metro liniyası boyınsha joybar bahalaw hújjetlerin islep shıǵıw rejelestirilgen. Birinshi basqıshta “Mingurik – Qubla vokzal” jónelisi, ekinshi basqıshta bolsa “Qubla vokzal – CHilanzar buyım bazarı” jónelisin qurıw imkaniyatları úyreniledi.

Metropolitende qosımsha dáramat dereklerin qáliplestiriw máselelerine de ayrıqsha itibar qaratıldı. Vagon hám platformalarda sanlı reklama maydanların aukcion arqalı jeke menshik sektorǵa ijaraǵa beriw, metro bándirgilerinde vending apparatları, kishi sawda obektlerin jaylastırıw, stanciyalar aldında avtomobil turıw orınların shólkemlestiriw rejelestirilmekte. Sonday-aq, bos turǵan imarat hám xanalardı kovorking hám kishi ofis sıpatında isbilermenlerge aukcion tiykarında ijaraǵa beriw usınıs etildi.

Avtotransporttan metro sistemasına qolaylı ótiwdi támiyinlew maqsetinde “Park&Ride” sistemasın jolǵa qoyıw usınıs etildi.
Prezentaciyada háreketleniw quramların jańalaw hám elektrodepo qurıw máseleleri de dodalandı. 2027-2030-jıllarda metropoliten ushın talap etiletuǵın háreketleniwshi qurılmalardı satıp alıw boyınsha usınıslar islep shıǵıladı. Usı múnásibet penen jańa háreketleniwshi sostavlar ushın elektrodepo qurıwǵa zárúr jer maydanı ajıratıladı.

Sonday-aq, 2027-2035-jıllarda Tashkent metropolitenin rawajlandırıw strategiyasın islep shıǵıw belgilenbekte. Onda metropoliten tarmaqların eki esege keńeytiw, jolawshı tasıw kólemin 2,5 esege arttırıw, ekologiyalıq turaqlı, energiya únemleytuǵın hám qáwipsiz transport sistemasın jaratıw, servis sapası hám jolawshılar ushın qolaylıqlardı bunnan bılay da arttırıw wazıypaları qamtıp alınadı.

Jol haqısın tólew sistemasın jetilistiriw boyınsha da usınıslar bildirildi. Sırt el tájiriybesi tiykarında aralıqqa qarap tólew, xalıq kategoriyaları ushın jeńillikler, kúnlik, háptelik hám aylıq abonementler sistemasın engiziw imkaniyatları úyreniledi.

Prezidentimiz jámiyetlik transport, ásirese, metropoliten iri qala turmısında eń áhmiyetli infrastrukturalardan biri ekenin atap ótti.

Sol sebepli, xızmettiń sapası, qáwipsizlik, finanslıq turaqlılıq hám zamanagóy basqarıwdı bir-biri menen tıǵız baylanıslı halda rawajlandırıw zárúr ekenligi atap ótildi. Usınıslar maqullanıp, olardı ámelge asırıw boyınsha juwapkerlerge tapsırmalar berildi.