Jáhán sawda shólkemine aǵza bolıw procesiniń barısı kórip shıǵıldı

Ótken jılı Ózbekstannıń JSShǵa aǵza bolıw procesi sheńberinde kóp hám eki tárepleme sóylesiwlerde salmaqlı nátiyjelerge erisildi.

Atap aytqanda, Ózbekstannıń JSShǵa aǵza bolıwı boyınsha jumısshı topardıń eki májilisi ótkerildi. Olarda 200 den aslam sorawlarǵa juwaplar, 30 dan aslam sırtqı sawdaǵa baylanıslı hújjetler JSSh aǵzalarına usınıldı.

Sonıń menen birge, eki tárepleme ilajlar sheńberinde 40 tan aslam sóylesiwler raundı alıp barıldı. 2025-jıldıń ózinde 11 mámleket penen sóylesiwler juwmaqlanıp, bunday mámleketlerdiń ulıwma sanı 33 ke jetti.

JSSh aǵzaları tárepinen Ózbekstanda bazar ekonomikasına ótiwge baylanıslı jedel reformalar ámelge asırılıp atırǵanı unamlı tán alınbaqta. Atap aytqanda, ótken jılı 68 nızamshılıq hújjeti JSSh hám xalıqaralıq normalarǵa beyimlestirildi.

Sonıń ishinde, JSSh qaǵıydalarına beyimlestiriw sheńberinde intellektuallıq múlkti dizimnen ótkeriw processleri ápiwayılastırılıp, bul tarawdaǵı huqıqbuzarlıqlar ushın juwapkershilik ilajları kúsheytilgeni, eksport sheklewleri biykar etilgeni hám ashıq-aydın mexanizmge iye eksport bajıları engizilgeni, ayırım ónimler ushın minimal eksport bahaların belgilew ámeliyatı biykar etilgeni atap ótildi.

Sonday-aq, sawdadaǵı texnikalıq tosqınlıqlardı qısqartıw, sanitariya hám fitosanitariya tarawında ámelge asırılıp atırǵan reformalar sheńberinde qáwipli dárejesi joqarı bolǵan ónimlerdi májbúriy mámleketlik dizimnen ótkeriwdiń byurokratiyalıq tártibi ornına sertifikatlastırıw engizildi, azıq-awqat ónimleriniń qáwipsizligi ústinen qadaǵalaw Sanitariyalıq-epidemiologiyalıq tınıshlıq hám jámiyet salamatlıǵı komitetine ótkerildi hám 14 azıq-awqat texnikalıq reglamentleri biykar etildi, 747 tovar poziciyası boyınsha májbúriy sertifikatlastırıw talapları saplastırıldı hám dizim 27 procentke qısqartıldı.

Prezentaciyada azıq-awqat óniminiń qáwipsizligi hám sawdanı qorǵaw ilajları haqqındaǵı jańa nızamlardı qabıl etiw, sanitariya, veterinariya hám karantin tarawına qáwipti tallaw, baqlawshılıq jáne ilimiy tiykarlanǵanlıq tártiplerin engiziw jaǵdayı kórip shıǵıldı.

Mámleketimiz basshısı usı jılı Ózbekstannıń JSShǵa tolıq aǵzalıǵın rásmiylestiriw boyınsha kompleksli jumıslardı sapalı ámelge asırıw boyınsha kórsetpeler berdi.

Sırtqı ekonomikalıq jumıs tarawındaǵı nızamshılıqtı JSSh qaǵıydaları hám xalıqaralıq sawda standartlarına tolıq muwapıqlastırıw jumısların sistemalı dawam ettiriw, JSShǵa aǵza bolıw boyınsha eki hám kóp tárepleme sóylesiwlerdi juwmaqlaw jáne aǵzalıqtı rásmiylestiriw boyınsha zárúr ilajlar belgilep alındı.