Xalıqaralıq jer silkiniw qurbanların eslew kúni
2026-04-29 / Waqıyalar kalendarı
BMSh Bas Assambleyası Ózbekstannıń baslaması menen 29-apreldi Xalıqaralıq jer silkiniw qurbanların eslew kúni dep járiyalaw haqqındaǵı rezolyuciyanı bir dawıstan qabıl etti.
Hújjetke dúnyanıń barlıq regionlarınan 80 nen artıq mámleket birgelikte avtorlıq etken.
Rezolyuciya Ózbekstan Prezidentiniń jer silkiniw qurbanlarına húrmet kórsetiw hám bul baǵdarda xalıqaralıq birge islesiw zárúrligin esletiw maqsetinde eslew hám tilekleslik kúnin shólkemlestiriw haqqındaǵı baslamasına tiykarlanǵan.
2023-jıl 16-mart kúni bolıp ótken Túrkiy mámleketler shólkeminiń gezeksiz sammitinde mámleketimiz basshısı tárepinen ayrıqsha jaǵdaylar boyınsha qánigelesken xalıqaralıq strukturalar menen ámeliy birge islesiwdi kúsheytiw zárúrligine ayrıqsha itibar qaratılǵan edi.
Xalıqaralıq jer silkiniw qurbanların eslew kúni birinshi márte 2026-jıl 29-aprel kúni belgilenedi. Bul sáne 1966-jılı Tashkent qalasında júz bergen wayran etiwshi jer silkiniwdiń 60 jıllıǵı múnásibeti menen belgilendi.