Júk vagonları parkin keńeytiw ilajları belgilendi

Mámleketimizde transport infrastrukturasın modernizaciyalaw, eksport potencialın keńeytiw hám ekonomika tarmaqların úzliksiz logistika xızmetleri menen támiyinlew mámleketlik siyasattıń tiykarǵı baǵdarlarınan biri bolıp esaplanadı.

Temir jol transportında keń kólemli jańalanıw processleri ámelge asırılmaqta. Olar tarawdı túpkilikli modernizaciyalaw, óndirislik quwatlıqlardı keńeytiw hám vagon parkin basqıshpa-basqısh jańalawǵa xızmet etpekte.
Atap aytqanda, 2023-2025-jıllarda bahası 105 million dollar bolǵan joybar sheńberinde 1590 yarım ashıq júk vagonı islep shıǵarıldı. Bul bolsa ishki hám xalıqaralıq tasıwlarda júk aylanısın arttırıw, logistika shınjırlarınıń turaqlılıǵın támiyinlew imkaniyatın bermekte.

Sonday-aq, 2025-2026-jıllarǵa mólsherlengen 150 million dollarlıq jańa basqıshta júk hám jolawshı vagonların islep shıǵarıw, sonıń menen birge, “Ózbekstan temir jolları” AJ quramındaǵı vagon islep shıǵarıw kárxanaların modernizaciyalaw jumısları alıp barılmaqta. Joybar sheńberinde 954 dana júk hám 70 dana jolawshı vagonların islep shıǵarıw baslanǵan.

Búgingi kúnge shekem bul joybar sheńberinde 45 jolawshı vagonı hám 340 cisterna islep shıǵarıldı. Usı jıldıń aqırına shekem qosımsha túrde 614 júk hám 25 jolawshı vagonları islep shıǵarıladı.

Kelesi jıllarda júk vagonların islep shıǵarıw kólemlerin keskin arttırıw ushın jaqında Prezidentimiz ayrıqsha qararǵa qol qoyǵan edi. Hújjetke muwapıq, qosımsha 100 million dollar qarjı ajıratılıp, 1350 dana júk vagonı jetkerip beriledi. Onıń ushın usı jıldıń ózinde sanaat kárxanalarınıń quwatlılıqların 1,5 esege arttırıw hám 2 mıń júk vagonların islep shıǵarıw wazıypası qoyıldı.

Mámleketimiz basshısı vagon parkin jańalaw, tasıw kólemlerin arttırıw hám qárejetlerdi optimallastırıw boyınsha juwapkerlerge tiyisli tapsırmalar berdi.