Awıl xojalıǵında texnikalar parki jańalanıp, sanlı sheshimler keńnen engiziledi

Búgingi kúnde awıl xojalıǵında mexanizaciya dárejesi 81 procentti quramaqta. Sonıń ishinde, sońǵı jılları 1 mıń 756 paxta teriw mashinası satıp alındı hám paxta teriminiń mexanizaciyalasıw dárejesi 52 procentke jetti. Ótken máwsimde 2,1 million tonna paxta mashina járdeminde jıynap alınǵan. Sonıń esabınan keyingi bes jılda qol miyneti 1,8 esege qısqardı.

Gezektegi wazıypa – paxtanı mashinada teriw úlesin keminde 70 procentke jetkeriw. Bunıń ushın 2026-jılı 800 paxta teriw mashinası, sonday-aq, 6 mıń seyalka, traktor hám kombayn satıp alınıwı rejelestirilgen. Ulıwma, jıl dawamında 10 mıń jańa texnika satıp alınıp, awıl xojalıǵı texnikaları parkin 292 mıńǵa jetkeriliwi názerde tutılǵan.

Jańa texnikalardı fermerlerge qolaylı shártlerde lizingke beriw maqsetinde xalıqaralıq finans institutlarınan 400 million dollar tartıladı. Texnikalar milliy valyutada 2 jıllıq jeńilletilgen dáwir menen 10 jılǵa 18 procent stavkada berilip, kredit stavkasınıń 8 procenti byudjet esabınan qaplap beriledi.

Prezentaciyada mámleketimizde awıl xojalıǵı mashina qurılısın rawajlandırıw, jergilikli óndiris hám xızmet kórsetiwdi keńeytiw tiykarǵı wazıypa ekeni atap ótildi.

2026-2028-jıllarda jergilikli islep shıǵarılatuǵın texnika hám agregatlar kólemin 5 esege, lokalizaciyalaw dárejesin qosımsha 10 procentke arttırıw áhmiyetli ekeni kórsetip ótildi. Atap aytqanda, 2026-jılı óndiris 6 mıńǵa shekem jetkeriliwi, 2028-jılǵa shekem lokalizaciyalaw kórsetkishin ózi júretuǵın texnikada 30-35 procentke, aspa hám tirkemeli texnikada 60-65 procentke jetkeriw rejelestirilgen.

Texnika hám agregatlardı satıp alıwda subsidiyalawdıń ámeldegi sisteması lokalizaciyalaw dárejesi 25 procentten joqarı bolǵan texnikaǵa engizilmekte. Prezentaciyada talap joqarı bolǵan 3 túrdegi import texnika ushın da subsidiya ajıratıwdı jolǵa qoyıw usınıs etildi. Ulıwma aytqanda, usı jılı texnika bahasınıń 15 procentin qaplaw ushın 660 milliard sum subsidiya qaratılıwı názerde tutılǵan.

Prezentaciyada Tashkent traktor zavodınıń jumısın salamatlandırıw hám qollap-quwatlaw ilajları da kórip shıǵıldı.
Tarawda zamanagóy bank xızmetlerin jolǵa qoyıw, sanlı texnologiyalar hám jasalma intellektke tiykarlanǵan sheshimlerdi engiziw baǵdarındaǵı jumıslar da tanıstırıldı.

2025-jılı “Agrobank” AKB tárepinen awıl xojalıǵı texnikası ushın 1,6 trillion sumlıq kreditler ajıratılǵan bolsa, usı jılı bul kórsetkishti 3,9 trillion sumǵa jetkeriw názerde tutılǵan. Kreditlew processlerin avtomatlastırıw nátiyjesinde kredit ajıratıw múddeti 3 kúnnen 3 saatqa shekem qısqarıwı kútilmekte.

Bunnan tısqarı, qarıydarlarǵa kompleksli awıl xojalıǵı xızmetleri kórsetiledi. Onda hár bir aymaqta birewden agroxızmet zonaları shólkemlestiriledi hám olarda awıl xojalıǵı agenti jumıs alıp baradı. Bul zonalarda fermerler bir orınnıń ózinde bank, konsalting, monitoring, topıraq analizi, nál jetkerip beriw xızmetlerinen, agronom másláhátinen paydalanıwı, oqıw kursları haqqında maǵlıwmat alıwı múmkin boladı.

Banktiń sharwashılıq hám miywe jetistiriwde, suwdıń jumsalıwın “aqıllı” basqarıwda jasalma intellektten paydalanıw boyınsha pilot joybarlardı ámelge asırıw, awıl xojalıǵında startaplardı qarjılandırıw maqsetinde ustav kapitalı 100 milliard sumlıq jańa venchur kompaniyasın shólkemlestiriw baǵdarındaǵı rejeleri de kórip shıǵıldı.

Mámleketimiz basshısı usınıslardı maqullap, awıl xojalıǵında mexanizaciya dárejesin jáne de arttırıw, jergilikli óndiris hám servisti rawajlandırıw, sanlı platformalar arqalı monitoring hám finanslıq xızmetlerdi jaqsılaw boyınsha juwapkerlerge bir qatar kórsetpeler berdi.