Awıl xojalıǵında jańa jerlerdi ózlestiriw hám ilimdi rawajlandırıwǵa qaratılǵan usınıslar tanıstırıldı

Irrigaciya hám melioraciya ilajları nátiyjesinde sońǵı bes jılda 826,5 mıń gektar jer awıl xojalıǵı paydalanıwına kirgizildi. Sonıń 409 mıń gektarı suwǵarılatuǵın jerler esabınan, 418 mıń gektarı bolsa suwǵarılmaytuǵın hám jaylaw jerlerde jer astı suwlarınan paydalanıw jáne az suw talap etetuǵın eginlerdi jaylastırıw arqalı ózlestirildi.
2030-jılǵa shekem jáne 938 mıń gektar jaylawlardı ózlestiriw hám jaǵdayın jaqsılaw rejeleri tanıstırıldı.

Atap aytqanda, 2026-2027-jıllarda 620 mıń gektar jaylaw tiklenip, sonnan 300 mıń gektarında jaylaw ósimlikleri egiledi, 130 mıń gektarında qudıqlar ornatıladı. Nátiyjede 960 mıń bas mayda qaramal baǵıw, gósh hám jún islep shıǵarıw kólemin arttırıw imkaniyatı jaratıladı.

Jańa jerlerdi ózlestiriwde hár bir aymaq boyınsha anıq investor hám joybar tiykarında jumıstı shólkemlestiriw zárúrligi atap ótildi.
Awıl xojalıǵında ilimdi jańa basqıshqa alıp shıǵıw ushın ámeldegi institucionallıq infrastrukturanı ózgertiw waqtı kelgeni atap ótildi. Usı maqsette tarawdaǵı 22 ilimiy oray, 260 laboratoriya jáne 2,5 mıńnan aslam ilimpaz hám ilimiy xızmetkerlerdi birden-bir struktura – Awıl xojalıǵı ilimleri akademiyasına birlestiriliwi belgilengen.

Prezentaciyada biotexnologiya hám molekulyar biologiya, gen injeneriyası hám gibrid tuqımgershiligi, “aqıllı” awıl xojalıǵı, kosmoslıq hám dron texnologiyaları, jerlerdiń degradaciyası hám salamat topıraq, organikalıq awıl xojalıǵı hám azıq-awqat qáwipsizligi, veterinariya, sanlı awıl xojalıǵın akademiya jumısınıń tiykarǵı baǵdarları sıpatında belgilew usınıs etildi.
Akademiyanıń jumısın nátiyjeli jolǵa qoyıw boyınsha ilajlar belgilep alındı.

Awıl xojalıǵı ushın kadrlar tayarlaw máselelerine ayrıqsha itibar qaratıldı. Házirgi waqıtta Tashkent mámleketlik agrar universitetinde 13,6 mıń student bilim alıp atırǵanı, biraq oqıw procesiniń ámeliyat penen jeterli dárejede baylanıspaǵanı sebepli pitkeriwshilerdiń tek ǵana 55 procenti óz tarawında islep atırǵanı kórsetip ótildi.

Usı múnásibet penen bilimlendiriw, ilimiy izertlew hám óndiristi úzliksiz baylanıstıratuǵın sistema jaratıw, miynet bazarınıń talabına say jetik qánigeler tayarlaw wazıypaları belgilendi.

Sonıń ishinde, keleshekte universitet studentleriniń 6,8 mıńı óndiris shólkemleri, kárxanalar hám agroklasterlerde, 2,6 mıńnan aslamı Awıl xojalıǵı ministrligi sistemasındaǵı 22 ilimiy-izertlew institutında ámeliyat óteydi.
Sonday-aq, fermer hám onıń xızmetkerleri perzentleriniń test sınaqlarında balları qabıllaw parametrlerine jetpese, muǵdarı azaytılǵan tólemli-kontrakt tiykarında universitetke qabıl etiw, jeti bilimlendiriw baǵdarı boyınsha oqıw dawamlılıǵın 4 jıldan 3 jılǵa qısqartıw usınıs etildi. Studentlerdi traktorshı-mashinist gúwalıǵı hám agrodronlardan paydalanıwǵa oqıtıw jolǵa qoyıladı.

Prezentaciyada Agrosanaattı rawajlandırıw agentliginiń jumısı kórip shıǵıldı.
Ótken jılı 44 mıń gektar ónimsiz jerlerde intensiv hám sanaatlastırılǵan baǵ hám júzim atızları shólkemlestirilip, 37 mıń jumıs ornı jaratıldı.

Bul jerlerde shólkemlestirilgen baǵ hám júzimgershilikler 2027-jıldan ónim bere baslap, jılına 660 million dollar miywe-ovoщ eksport etiw imkaniyatı payda boladı. Máselen, Swxta 500 gektarda alma, malina hám erik, Termiz rayonında 164 gektarda erik hám shabdal, Ohangaron rayonında 309 gektar, Bulunǵurda 550 gektar jáne Quvada 60 gektar jerde júzimniń “Avatar” sortı,

Pop rayonında bolsa 504 gektarda shabdal hám qáreli plantaciyaları shólkemlestirildi.
Bul jumıslardı dawam ettirip, 2026-jılı 25,5 mıń gektar miyweli baǵlar hám 5 mıń gektar júzim atızların shólkemlestirip, 48 mıń turaqlı hám máwsimlik jumıs orınların jaratıw zárúr ekenligi atap ótildi.

Hár jılı elimizge 60 million dollarlıq náller import etilmekte. Bul nállerdi Evropa standartları tiykarında ózimizde tayarlaw ushın barlıq imkaniyatlar bar ekenligi kórsetip ótildi.
Bul baǵdarda agentlik tárepinen 200 den aslam miywe túrleriniń virustan jıraq, joqarı ónimdarlı analıq sortlarınıń kollekciyası jaratılǵan. Bul miywe túrlerin kóbeytiw hám barlıq aymaqlarǵa jetkerip beriw maqsetinde Bektemir rayonında 50 gektar, Joqarı

Shırshıq rayonında bolsa 75 gektarlıq “in-vitro” laboratoriyaları hám analıq nálxanalarınan ibarat kompleksler shólkemlestirilmekte. Bul komplekslerdi jıldıń aqırına shekem iske qosıp, jıllıq 27 million nál tayarlaw wazıypası qoyıldı.
Prezidentimiz prezentaciyada dodalanǵan máseleler boyınsha juwapkerlerge tiyisli tapsırmalar berdi.