Urbanizaciya hám turaq jay qurılısındaǵı aldaǵı wazıypalar kórip shıǵıldı

Xalıqtıń turaq jayǵa bolǵan talabın qanaatlandırıw maqsetinde sońǵı 8 jılda mámleketimizde 120 million kvadrat metr yamasa 600 mıńnan aslam kvartiralar qurılıp, paydalanıwǵa tapsırıldı. Turaq jay satıp alıwǵa járdemlesiw ushın 541 mıń puqaraǵa 103 trillion sum arzan ipoteka kreditleri hám subsidiyalar ajıratıldı.

Qurılıs jumıslarınıń kólemi keńeygeni qurılıs materialları sanaatınıń rawajlanıwına úlken túrtki bolıp, kóplegen aymaqlardıń “drayveri”ne aylandı. Urbanizaciya dárejesi 1991-jıldaǵı 40,3 procentten 51 procentke jetti.

Mámleketimiz basshısı islengen jumıslar ele jetkilikli emesligin kórsetip ótti. Respublika boyınsha hár jılı 200 mıńǵa shamalas jańa shańaraq qurılmaqta. Bul jańa turaq jaylar, jollar hám sociallıq infrastrukturaǵa talap jáne de artadı degeni. Qalaberdi, házirgi waqıtta xalıqtıń bir adamına ortasha 18,9 kvadrat metr turaq jay maydanı tuwra kelmekte. Bul kórsetkishti keminde 23 kvadrat metrge jetkeriw ushın 2040-jılǵa shekem jańa turaq jay qurılısınıń pátin 280 mıńǵa arttırıw kerek.

Usı maqsette urbanizaciya tarawında basqarıw jańa sistema tiykarında jolǵa qoyılıp, óz aldına komitet dúzilip, onıń aldına turaq jay qurıw kólemlerin basqıshpa-basqısh arttırıw wazıypası qoyıldı. Atap aytqanda, 2026-jılı 140 mıń, 2027-jılı 150 mıń hám 2028-jılı 160 mıń kóp kvartiralı turaq jaylardı qurıw rejelestirilgen.

Prezidentimiz biznes hám startaplardıń rawajlanıwı ushın sharayat jaratıw, sanaat hám IT klasterlerin qáliplestiriw, miynet ónimdarlıǵın arttırıwda aqılǵa uǵras shólkemlestirilgen urbanizaciya áhmiyetli orın iyeleytuǵının atap ótti.

Prezentaciyada jer resurslarınan nátiyjeli paydalanıw máselelerine de ayrıqsha itibar qaratıldı. Xalıqaralıq shólkemlerdiń esap-sanaqlarına bola, elatlı punktlerdiń tártipsiz keńeyip barıwı ayırım aymaqlarda keleshekte egislik jerlerdiń jetispewshiligine alıp keliwi múmkin.

Usı múnásibet penen gónergen turaq jay fondın jańalaw, turaq jay qurılısında renovaciya úlesin arttırıw zárúr ekenligi atap ótildi. Onda renovaciya úlesin házirgi 15 procentten 2040-jılǵa shekem 60 procentke jetkeriw, “Jańa Ózbekstan” massivlerin qurıwdı keńeytip, 120 ǵa jetkeriw zárúr ekenligi atap ótildi.

Búgingi kúnde qurılıs tarawındaǵı ruqsat alıw processleri 9 basqıshtan ibarat bolıp, ortasha 90-120 kún waqıt talap etpekte. Sonıń menen birge, xalıqaralıq ámeliyatta “qurılısqa tayar jer” mexanizmi arqalı bul jumıslarǵa ketetuǵın waqıt 7-15 kúndi qurap atırǵanı kórsetip ótildi.

Mámleketimizde bul sistemanı engiziw usınıs etildi. Oǵan bola, barlıq tayarlıq processleri hám ruqsatnamalardı rásmiylestiriw jer maydanları aukcionǵa qoyılıwınan aldın orınlanadı. Nátiyjede isbilermen aukcionda jerdi utıp alǵannan soń qosımsha hújjet jıynamastan hám kelisimlerden ótpesten, barlıq hújjetlerdi avtomatikalıq túrde alıw imkaniyatına iye boladı. Qurılısqa tayar bolmaǵan jerlerdi aukcionǵa shıǵarıw qadaǵan etiledi, processler bolsa ashıq-aydın hám qısqa múddetlerde ámelge asırılıwı támiyinlenedi.

Qurılıs sapası, birinshi gezekte, joybar hújjetlerine baylanıslı. “ToshkentboshplanLITI”, “WzshaharsozlikLITI”, “WzGAShKLITI”, “Qishloqqurilishloyiha” shólkemleriniń jumısın túp-tiykarınan jaqsılaw, bul ushın joqarı mamanlıqtaǵı sırt el qánigelerin tartıw hám zamanagóy basqarıw sistemasın engiziw zárúr ekenligi atap ótildi.
Urbanizaciya hám turaq jay qurılısı processlerin durıs hám nátiyjeli rejelestiriw ushın sanlı texnologiyalardan keńnen paydalanıw kerek. Bul baǵdarda prezentaciyada bas hám master rejelerdiń birden-bir maǵlıwmatlar bazası, qurılısqa tayar jer maydanları bazası – “Jer banki”, kóp kvartiralı turaq jaylardıń birden-bir geomálimleme bazası, “eskrou” sisteması, qurılısshılar reytingi hám basqalardan ibarat “Turaq jay” málimleme sistemasın islep shıǵıw usınıs etildi.

Prezidentimiz usınıslardı maqullap, tarawda rejeli, esap-sanaqqa tiykarlanǵan hám uzaq múddetli qatnaslardı izbe-iz engiziw, belgilengen kórsetkishlerdiń orınlanıwın támiyinlew boyınsha juwapkerlerge tiyisli tapsırmalar berdi.