Ózbekstan Prezidenti Aziya Olimpiada keńesiniń 46-Bas assambleyası qatnasıwshıların qutlıqladı

Ilajda jetekshi xalıqaralıq hám regionallıq sport shólkemleriniń basshıları hám wákilleri, sonıń ishinde, Milliy olimpiada komitetleri associaciyasınıń birinshi vice-prezidenti, Qatar Olimpiada komitetiniń prezidenti Shayx Javan bin Hamad Ol Soniy, Pútkil jer júzilik antidoping agentliginiń prezidenti Vitold Banka, Xalıqaralıq gimnastika federaciyasınıń prezidenti Morinari Vatanabe, Xalıqaralıq awır atletika federaciyasınıń prezidenti Muhammad Jalud, “World Boxing” shólkeminiń prezidenti Gennadiy Golovkin, Xalıqaralıq shóp ústinde xokkey federaciyasınıń prezidenti Muhammad Tayyab Ikram, Aziya Paralimpiada komitetiniń prezidenti Majid Rashid, Xalıqaralıq sambo federaciyasınıń prezidenti Vasiliy Shestakov, Milliy olimpiada komitetleri associaciyasınıń bas xatkeri Gunilla Lindberg hám Afrika Olimpiada komitetleri associaciyasınıń prezidenti Mustafo Berraf ta qatnastı.

Sonday-aq, assambleya jumısında arnawlı miymanlar hám rásmiyler, atap aytqanda, Amerika Qurama Shtatları Prezidentiniń arnawlı wákili Paolo Zampolli, Rossiya Federaciyası sport ministri Mixail Degtyaryov, Saudiya Arabstanı Patshalıǵı sport ministri Abdulaziz bin Túrkiy Ol Saud, Qatar jaslar hám sport ministri Shayx Hamad bin Xalifa Ol Soniy hám basqalar qatnastı.

Mámleketimiz basshısı óziniń shıǵıp sóylegen sózinde barǵan sayın kúsheyip atırǵan globallıq kelispewshiliklerge qaramastan, sport mámleketler hám xalıqlar arasındaǵı sóylesiw, óz-ara túsinisiw hám birge islesiwdi bekkemlewdiń universal quralı sıpatında orın ieleytuǵının ayrıqsha atap ótti.

Ózbekstan Prezidenti Shayx Javan bin Hamad Ol Soniydi Aziya Olimpiada keńesiniń prezidenti etip saylanǵanı menen qutlıqlap, onıń joqarı dárejedegi kásiplik sheberligi, salmaqlı xalıqaralıq tájiriybesi hám tek ǵana Aziya kontinentinde emes, al pútkil dúnyada sporttıń rawajlanıwına qosqan úlken úlesin atap ótti.

Ózbekstannıń Aziya Olimpiada keńesi menen kóp táreplemeli birge islesiwin rawajlandırıwǵa ayrıqsha itibar qaratıldı. Keńes Atqarıw komitetiniń 77-sessiyası tabıslı ótkerilgeni, respublikamız wákili Oraylıq Aziya regionı boyınsha vice-prezident etip saylanǵanı hám 2029-jılǵı Jaslar Aziya oyınlarına basshılıq etiw ushın Ózbekstan tańlanǵanı atap ótildi.

Mámleketimiz basshısı Jańa Ózbekstanda denetárbiya hám sport tarawında ámelge asırılıp atırǵan keń kólemli reformalar haqqında da sóz etti.

Úsh basqıshlı “Prezident Olimpiadası” kompleksli sport jarısları sisteması jolǵa qoyıldı, zamanagóy sport infrastrukturası, atap aytqanda, Olimpiada qalashası qurıldı, joqarı mamanlıqtaǵı sportshılardı tańlap alıw hám tayarlaw sisteması keńeytilmekte.
Xalıqaralıq maydandaǵı joqarı nátiyjeler, sonıń ishinde, 2024-jılı Parijde bolıp ótken Olimpiada hám Paralimpiada oyınlarında Ózbekstan sportshılarınıń tabıslı qatnasqanı jáne elimizde ǵalabalıq sport rawajlanıp, búgingi kúnde 15 millionnan aslam xalıq turaqlı túrde denetárbiya menen shuǵıllanıp atırǵanı atap ótildi.

Xalıqaralıq hám Aziya sport shólkemleri Ózbekstan milliy sport federaciyaları menen 20 dan aslam kelisimlerge qol qoyǵanı atap ótildi.

Atap aytqanda, Xalıqaralıq awır atletika federaciyası Tashkent wálayatınıń Bostanlıq rayonında Akbar Jwraev atındaǵı awır atletika sport klubın zamanagóy ilimiy qatnas tiykarında rawajlandırıwǵa járdemlesedi, Birlesken gúres dúnyası shólkemi Regionallıq sport gúresleri akademiyasın shólkemlestiredi. Aziya voleybol konfederaciyası hár bir wálayatta birewden voleybol boyınsha sport klubın qursa, Shóp ústinde Xalıqaralıq xokkey federaciyasınıń texnikalıq járdeminde 2 stadion qurıladı.

Ózbekstannıń hadal sport principine ámel etiw hám dopingke qarsı gúresiwdiń isenimli tárepdarı bolıp qalatuǵını atap ótildi.
Bul baǵdarda Tashkentte Oraylıq Aziya regionallıq antidoping shólkemleriniń májilisi hám xalıqaralıq forum ótkerilip atırǵanı ayrıqsha áhmiyetke iye ekeni atap ótildi.

Mámleketimiz basshısı Jańa Ózbekstan barlıq mámleketler menen sport tarawında kóp táreplemeli hám uzaq múddetli birge islesiw ushın ashıq ekenligin tastıyıqlap, sport diplomatiyasın rawajlandırıw hám birgeliktegi baslamalardı alǵa qoyıwǵa tayar ekenin atap ótti.

Ilaj juwmaǵında Shayx Javan bin Hamad Ol Soniy olimpiada háreketin rawajlandırıw, áhmiyetli sport baslamaların alǵa qoyıwǵa qosıp atırǵan ayrıqsha úlesi ushın Ózbekstan Milliy Olimpiada komitetiniń “Shon-sharaf” ordeni menen sıylıqlandı.