Sport tarawındaǵı jumıslardıń esap-sanaǵı hám tiykarǵı wazıypalar dodalandı

Atap ótilgenindey, sportta bir pútin sistema jaratılǵanı óziniń ámeliy nátiyjelerin bere basladı.
Xalıqtıń ǵalabalıq sport penen qamtıp alınıwı 15 millionǵa jetti, sport penen turaqlı shuǵıllanıwshılardıń sanı sońǵı jıllarda derlik 1,5 esege arttı.

Ótken jılı jaslarımız jáhán universiadasında 13-orın, Baxreyndegi Aziya jaslar oyınları hám Saudiya Arabstanındaǵı Islam tileklesligi jarısında 2-orın, BAÁdegi Jaslar Paraaziya oyınlarında 1-orındı iyeledi.

Futbol boyınsha milliy saylandı komandamız birinshi márte jáhán chempionatına jollamanı qolǵa kirgizdi, bıyıl shaxmatshımız Javohir Sindarov bolsa “Jáhán tajı” ushın talabanlar turnirinde qatnasadı.
Sonıń menen birge, bul nátiyjeler menen sheklenip qalmaw, bar imkaniyatlar hám jaratılǵan sharayatlardan tolıq paydalanıw zárúr ekenligi atap ótildi. Ayırım sport túrleri boyınsha nátiyjeler ele bar infrastruktura hám potencialǵa tolıq sáykes kelmey atırǵanı kórsetip ótildi.

Bárinen burın, ǵalabalıq sport penen shuǵıllanıwshılardıń sanın jaqın keleshekte 17 millionǵa jetkeriw zárúr ekenligi atap ótildi.
Xalıqaralıq sport oyınları hám Olimpiadalar ushın múnásip rezerv jaratıw maqsetinde shólkemlestirilgen Prezident olimpiadası arqalı ashıq-aydın selekciya sistemasın jolǵa qoyıwdı dawam ettiriw áhmiyetli ekeni kórsetip ótildi.

Birinshi jarısta 103 mıń sportshı qatnastı, final basqıshında 11 sport túri boyınsha 3 mıńnan aslam sportshı 135 altın, 134 gúmis hám 227 qola medal ushın bellesti.
Endi jarıslardı jılına 2 márte ótkeriw hám aymaqlarda 13-14 jas kategoriyasında shólkemlestiriw, sport túrleriniń sanın basqıshpa-basqısh 20 ǵa jetkeriw tapsırıldı.

Sonday-aq, ótken jılı Olimpiada qalashası hám Milliy futbol orayınıń paydalanıwǵa tapsırılǵanı sport tarawında áhmiyetli tariyxıy waqıya sıpatında atap ótildi. Házirgi kúnde Olimpiada qalashasına 17 olimpiada sport federaciyası hám basqa da sport shólkemleri kóship kelgen. Endi bul kompleksler ózbek sportınıń milliy tımsalı hám birden-bir klasterine aylanıwı kerek ekenligi atap ótildi.

Sport tarawın bunnan bılay da rawajlandırıwda ilimiy qatnastı kúsheytiw máselelerine ayrıqsha itibar qaratıldı. Atap ótilgenindey, joqarı sport nátiyjelerine erisiw tek ǵana infrastruktura hám jarıslar emes, al sport iliminiń barlıq baǵdarların sistemalı rawajlandırıw menen tikkeley baylanıslı.

Bul baǵdarda sport farmakologiyası, dietologiya, funkcionallıq hám fizikalıq tayarlıq, reabilitaciya jáne júklemelerdi individual rejelestiriw boyınsha zamanagóy qatnaslardı ámeliyatqa keńnen engiziw wazıypaları belgilendi. Ilimiy-izertlew jumısların jedellestiriw, sport tarawındaǵı aldınǵı qollanbalar hám sońǵı izertlew nátiyjelerin ámeliyatqa engiziw, sonday-aq, milliy hám xalıqaralıq dárejede ilimiy ánjumanlar hám konferenciyalar ótkeriw arqalı tájiriybe almasıwın kúsheytiw áhmiyetli ekeni atap ótildi.

Sonıń menen birge, sport tarawın rawajlandırıwǵa jeke menshik sektor hám investorlardı keńnen tartıw, sport infrastrukturası, tayarlıq orayları hám sport xızmetleri bazarında investiciyalıq joybarlardı qollap-quwatlaw kerek ekenligi aytıldı.
Jaslardı ǵalabalıq sportqa tartıwda sport mektepleriniń máhállelerge kirip barıwın támiyinlew, qábiletli jaslardı erte anıqlaw hám olardı maqsetli tayarlaw sistemasın bekkemlew zárúr ekenligi ayrıqsha atap ótildi.

Usı jıldıń yanvar ayında Tashkent qalasında ótkeriliwi rejelestirilgen xalıqaralıq sport ilajları haqqında málimleme berildi.
Atap aytqanda, Pútkil jer júziw federaciyası Atqarıw byurosınıń májilisi, Oraylıq Aziya regionallıq antidoping shólkemi (RADOCA) májilisi hám xalıqaralıq forum, sonday-aq, Aziya olimpiada keńesiniń 46-Bas assambleyasına basshılıq etiw rejelestirilgeni atap ótildi.

Aziya Olimpiada keńesi 1982-jılı shólkemlestirilgen bolıp, Aziya kontinentinde olimpiada háreketin muwapıqlastıradı hám 45 mámleket milliy olimpiada komiteti oǵan aǵza esaplanadı. Bas assambleya sheńberinde Aziya olimpiada háreketiniń tiykarǵı baǵdarların belgilew hám keńes prezidenti lawazımına saylaw ótkeriw názerde tutılǵan.

Bul ilajlarda Xalıqaralıq olimpiada komiteti, Aziya olimpiada keńesi, WADA, xalıqaralıq sport federaciyalarınıń basshıları hám basqa da abıraylı sport shólkemleriniń wákilleri qatnasıwı, jámi 360 tan aslam sırt el miymanlarınıń keliwi kútilmekte.
Mámleketimiz basshısı bul ilajlardı joqarı dárejede ótkeriwge puqta tayarlıq kóriw boyınsha tapsırma berdi.
Sońǵı jıllarda Ózbekstan gúres sport túrleri boyınsha regionda da, jáhán kóleminde de turaqlı hám kúshli poziciyanı iyelemekte.

Endi bul sporttı jáne de ǵalaba en jaydırıw ushın Regionallıq sport gúresleri akademiyası shólkemlestiriletuǵını belgilendi.
Sonday-aq, usı jıldan baslap Prezident kubogi, “Ózbekstan batırları” turniri, Bas prokuror kubogi, áskeriy xızmetkerler arasında gúres sport jarısları turaqlı ótkerip barıladı. 2026-jılı aymaqlarda qurılıp atırǵan mekteplerde milliy gúres penen birge grek-rim, erkin gúres hám hayal-qızlar gúresi boyınsha sportshılardı tayarlaw baslanadı. Jıldıń aqırına shekem hár bir rayon hám qalada keminde birewden mektepte gúres sportı klubları ashıladı.

Mámleketimiz basshısına usı jılı Italiyada bolıp ótetuǵın XXV qısqı Olimpiada oyınlarında Ózbekstan delegaciyasınıń qatnasıwı boyınsha da málimleme berildi.

Prezidentimiz belgilengen wazıypalardı tolıq hám sapalı orınlaw, sporttı ǵalaba en jaydırıw jáne xalıqaralıq maydanda turaqlı nátiyjelerge erisiwdi támiyinlew boyınsha juwapkerlerge tiyisli tapsırmalar berdi.