Ózbekstan Respublikası Qurallı Kúshleri dúzilgeniniń 34 jıllıǵı hám Watan qorǵawshıları kúni múnásibeti menen bayram qutlıqlawı

Húrmetli ásker hám serjantlar, oficer hám generallar!
Húrmetli Qurallı Kúshlerimizdiń veteranları!
Qádirli watanlaslar!

Bárinen burın, siz, ázizlerdi, kóp milletli pútkil xalqımızdı Ózbekstan Respublikası Qurallı Kúshleri dúzilgeniniń 34 jıllıǵı hám Watan qorǵawshıları kúni menen qızǵın qutlıqlayman.

Bul qutlı áyyyamda óz ómirin Watandı qorǵawday oǵada maqtanıshlı hám juwapkershilikli jumısqa baǵıshlaǵan, áskeriy antına sadıq qalıp, elimizdiń ǵárezsizligin hám aymaqlıq pútinligin kózdiń qarashıǵınday saqlap kiyatırǵan ana jurt saqshılarına jáne bir márte joqarı húrmet-izzet bildiremiz.

Házirgi waqıtta Watan aldındaǵı jigitlik minnetin orınlaw waqtında mártlershe qaytıs bolǵan qaharman ullarımızdıń esteligine tereń húrmet kórsetemiz.
Búgingi kúnde xalqımız Jańa Ózbekstandı qurıw jolında úlken jetiskenlik hám sheklerdi qolǵa kirgizbekte. Turmısımızdıń barlıq taraw hám tarmaqlarında ámelge asırılıp atırǵan shın mánisindegi tariyxıy ózgerislerde dańqlı Qurallı Kúshlerimizdiń, sizlerdiń de múnásip úlesińiz bar, desek, áyne haqıyqattı aytqan bolamız.

Biz sizlerdi ullı ata-babalarımız dástúrleriniń dańqlı dawamshıları dep bilemiz hám sizler sıyaqlı Watanǵa pidayı, jawǵa ayawsız, jawıngerlik saplarda bárqulla sergek hám gúreske tayar bolǵan kúsh-ǵayrat iyeleri menen orınlı túrde maqtanamız.

Búgingi imkaniyattan paydalanıp, el-jurtımızǵa mine usınday márt, batır perzentlerdi tárbiyalap bergen ata-analarǵa, áskeriy xızmet dawamında barlıq quwanısh hám táshwishlerdi olar menen birge bólisip kiyatırǵan shańaraq aǵzalarına ózimniń shın júrekten minnetdarshılıǵımdı bildiremen.
 

Qádirli doslar!

Keyingi jılları “Ózbekstan – 2030” strategiyası sheńberinde artqa qaytpaytuǵın reformalarımızdıń bekkem kepillikleriniń birine aylanıp atırǵan Qurallı Kúshlerimizdiń áskeriy qúdiretin arttırıw boyınsha keń kólemli jumıslardı ámelge asırmaqtamız. Sonıń ishinde, basqarıw hám támiynat sisteması jetilistirilip, zamanagóy málimleme texnologiyaları tiykarında modernizaciyalanbaqta, áskerlerimizdiń jawıngerlik qatarları jańasha tálim hám tárbiya alǵan tájiriybeli oficer hám serjantlar menen tolıqtırılmaqta.

Jeke quramnıń tayarlıq dárejesi, áskeriy xızmetkerlerdiń kásiplik, intellektuallıq hám ruwxıy potencialı izbe-iz arttırıp barılmaqta. Qurallı Kúshlerimiz zamanagóy qural-jaraq hám áskeriy texnika menen basqıshpa-basqısh támiyinlenbekte.

Jaslar arasında áskeriy xızmetke qızıǵıwshılıqtı arttırıw, olardı watansúyiwshilik ruwxında tárbiyalaw, xalıq penen armiya arasındaǵı bekkem birlik hám awızbirshilikti bunnan bılay da kúsheytiwge qaratılǵan nátiyjeli jumıslarımız isenimli dawam ettirilmekte.

Házirgi waqıtta dúnyanıń siyasiy hám áskeriy kartasında qanday jedel ózgerisler júz berip atırǵanın bárshemiz kórip, túsinip turmız.

Túrli regionlarda geosiyasiy jaǵday barǵan sayın qıyınlasıp, qarama-qarsılıq hám qanlı soqlıǵısıwlar kúsheymekte. Zamanagóy texnologiyalar, jańa áwlad qural-jaraqları payda bolmaqta, jawıngerlik háreketlerdi alıp barıwdıń strategiyası hám taktikası jáne de jetilisip barmaqta.

Házirgi jaǵdaydı esapqa alǵan halda, biz keleshekte jawıngerlik hám basqarıw usılların zaman talapları tiykarında jańalaymız, joqarı mamanlıqtaǵı áskeriy kadrlardı tárbiyalawǵa ayrıqsha itibar qaratamız.

Ásirese, áskeriy xızmetkerlerdiń jawıngerlik ruwxı hám fizikalıq tayarlıǵın turaqlı arttırıp barıw, olardıń qálbinde watansúyiwshilik sezimin kúsheytiw biz ushın tiykarǵı wazıypa bolıp qaladı. Sebebi, hár qanday gúrestiń táǵdirin jeke quramnıń bilim hám mamanlıǵı, erk-ıqrarı hám isenimi, ózine bolǵan isenimi, mártlik pazıyletleri sheshedi.

Milliy armiyamızdı zamanagóy qural-jaraq hám áskeriy texnika, sonıń ishinde, jasalma intellekt tiykarında robotlastırılǵan kompleksler menen támiyinlew, áskerlerdi basqarıw hám qarar qabıl etiw processlerine aldınǵı málimleme texnologiyaların jáne de keńnen engiziw de bárqulla itibarımız orayında boladı.

Áskeriy xızmetkerler hám olardıń shańaraq aǵzaların sociallıq qorǵawǵa baylanıslı jumıslardıń nátiyjeliligin arttırıp, olardıń turmıs abadanlıǵın arttırıwǵa qaratılǵan jumıslardı kúsheytemiz. Bul baǵdarda mámleketlik hám puqaralıq institutları jáne keń jámiyetshiliktiń belsene qatnasıwına ayrıqsha áhmiyet qaratamız.

Hár bir áskeriy xızmetker xalıq penen armiya – bir tán, bir jan ekenin, onıń artında 38 millionlıq xalıq tawday súyenish bolıp turǵanın bárqulla seziwi, onnan sheksiz kúsh, ruwx hám mádet alıwı kerek.

Kúsh-ǵayratta teńsiz bolǵan áskerlerimiz dushpanlar aldında hesh qashan bas iymegen qorqpaytuǵın hám erjúrek ata-babalarımızdıń ólmes miyrasın úyrenip, olardan ibrat alıp, Watan aldındaǵı muqaddes minnetin bunnan bılay da maqtanısh penen orınlaytuǵınına isenemen.
 

Áziz Watan qorǵawshıları!

Mine usı tolqınlandırıwshı demlerde hár birińizdi búgingi bayram menen jáne bir márte shın júrekten qutlıqlap, sizlerge hám shańaraq aǵzalarıńızǵa bekkem densawlıq, baxıt-ıǵbal, mámleketimizdiń qorǵanıw qábiletin bekkemlew baǵdarındaǵı ullı jumısıńızda úlken tabıslar tileymen.
Janajan Watanımızdı qorǵaw jolında hesh qashan sharshamań, tabıs hám jeńis sizlerge hámiyshe yar bolsın!

Shavkat MIRZIYoEV,
Ózbekstan Respublikası Prezidenti,
Qurallı Kúshler Joqarı Bas Sárkardası