Toqımashılıq sanaatında jıl juwmaqları hám keleshektegi áhmiyetli wazıypalar kórip shıǵıldı

Usı jılı tarmaqta erisilgen nátiyjeler, óndiris hám eksport kórsetkishleriniń ósiw dinamikası, sonday-aq, 2026-jılǵa mólsherlengen maqsetli rejeler hár tárepleme kórip shıǵıldı.

Atap ótilgenindey, 2025-jılı toqımashılıq sanaatında óndiris kólemi 134 trillion sumdı quraǵan. Sırt el investiciyaların ózlestiriw 2,1 milliard dollarǵa jetken. Eksport kólemi bolsa 2,5 milliard dollardı qurap, ótken jılǵa salıstırǵanda ósiw támiyinlengen. Tarmaqta bánt xalıq sanı 623 mıńǵa jetkeni, kelesi jılı bul kórsetkishti 650 mıńǵa shekem arttırıw imkaniyatı bar ekenligi atap ótildi.

2026-jılı paxta shiyki zatın qayta islewdi jáne de tereńlestiriw hám gezleme, trikotaj hám tayar ónimler islep shıǵarıw quwatlıqlarınan paydalanıw dárejesin arttırıw názerde tutılǵan. Ónim islep shıǵarıw kólemin 147 trillion sumǵa, eksporttı bolsa 3,3 milliard dollarǵa jetkeriw maqset etilgen.

Tarmaqqa 2,2 milliard dollar sırt el investiciyasın tartıw rejelestirilgen. Onıń esabınan 207 mıń tonna sintetikalıq, aralas jip, 397 million kvadrat metr gezleme, 224 million dana tigiw-trikotaj ónimlerin islep shıǵarıw jáne 108 million kvadrat metr gezleme boyaw boyınsha qosımsha quwatlıqlar qurıladı.

Sonıń menen birge, tarmaqtıń turaqlı rawajlanıwına tosqınlıq etip atırǵan ayırım faktorlar da atap ótildi. Atap aytqanda, paxta talshıǵına bolǵan talaptıń bir bólegi import esabınan qaplanıp atırǵanı, qarjı resurslarınıń bahasınıń joqarılıǵı, sırtqı bazarlarda logistika qárejetleriniń artıwı hám ayırım baǵdarlarda maman qánigelerdiń jetispewshiligi taraw aldında turǵan áhmiyetli máseleler sıpatında kórsetip ótildi.

Bul mashqalalardı sheshiw maqsetinde 2026-jıl ushın anıq ilajlar islep shıǵılǵan. Sonıń ishinde, kárxanalarǵa aylanıs qarjı ushın 200 million dollar muǵdarında jeńilletilgen kredit ajıratıw, 138 kárxananı finanslıq salamatlandırıw, 100 jańa kárxananı eksport jumısına tartıw rejelestirilmekte.

Xalıqaralıq standart hám sertifikatlardı engiziwge ayrıqsha itibar qaratıladı. “Better Work”, “BCI”, “FWF”, “Organic EU” sıyaqlı baǵdarlamalar 60 kárxanada engiziledi, finanslıq esabattıń xalıqaralıq standartları 15 kárxanada engiziledi. Sonday-aq, tayar ónimlerdiń sapası boyınsha 24 túrdegi analizlerdi ótkeretuǵın zamanagóy toqımashılıq laboratoriyası shólkemlestiriledi.
Tarmaqta sanlastırıwdı jedellestiriw, ERP sistemaları hám jasalma intellekt texnologiyaların engiziw arqalı óndiris nátiyjeliligin arttırıw názerde tutılǵan. Bul processke 40 kárxana tartıladı.

Sırt el birge islesiwin keńeytiw sheńberinde xalıqaralıq sorsing kompaniyaları hám iri brendler menen birge islesiwdi kúsheytiw, marketing izertlewleri hám xalıqaralıq kórgizbelerde qatnasıw, sırt el kárxanalarınıń relokciyasın xoshametlew boyınsha anıq rejeler belgilep alınǵan.

Mámleketimiz basshısı usınılǵan kózqaraslardı maqullap, tarmaqta tayar ónim úlesin izbe-iz arttırıw, ónimniń ózine túser bahasın azaytıw, investiciyalıq hám eksport potencialın tolıq iske qosıw boyınsha juwapker adamlardıń aldına anıq wazıypalardı qoydı. Barlıq ilajlar tarmaqtı turaqlı, básekige shıdamlı hám joqarı qosımsha qunlı ónimler islep shıǵaratuǵın sistemaǵa aylandırıwǵa xızmet etiwi zárúr ekenligi atap ótildi.