Ximiya sanaatın rawajlandırıw rejeleri prezentaciya etildi

Atap ótilgenindey, mámleketimizde ximiya sanaatın jedel rawajlandırıw hám sanlastırıw boyınsha anıq strategiya qabıl etilgen. 2030-jılǵa shekem tarmaq kólemin keminde eki esege arttırıw, mineral tóginler islep shıǵarıwdı 1,5 esege kóbeytiw hám eksport kólemin 1 milliard dollarǵa jetkeriw rejelestirilgen.

Búgingi kúnde tarmaqta ulıwma bahası 1 milliard dollarlıq 21 iri joybar ámelge asırılmaqta, kelesi úsh jıl ushın jáne 4,5 milliard dollarlıq baslamalar qáliplestirilgen.

Prezentaciyada ximiya sanaatındaǵı iri kárxanalarda ayırım óndiris quwatlıqlarınıń eskirgeni aqıbetinde energiya qárejetleriniń joqarılıǵı hám básekige shıdamlılıǵınıń tómenligi kórsetip ótildi. Mısalı, azotlı tóginler ózine túser bahasınıń 55 procentine shekemgi bólegi energiya qárejetlerine tuwra kelmekte.
Tarawda energiyanı únemleytuǵın texnologiyalardı engiziw hám sanlastırıw arqalı qárejetlerdi keskin qısqartıw zárúr ekenligi kórsetip ótildi.

Dúnyada ximiya ónimleriniń bazarı tez pátler menen ósip barmaqta. Qońsı mámleketlerde 1 milliard dollarlıq ónimlerge talap hám logistika ushın qolaylı sharayatlar bolsa da, bul potencialdan jeterlishe paydalanılmay atırǵanı atap ótildi.
Prezentaciyada jergilikli shiyki zattı tereń qayta islew esabınan jańa ónim túrlerin ózlestiriw hám eksporttı keminde eki esege arttırıw múmkin ekenligi atap ótildi.
Usı jılı Tashkent, Nawayı hám Jizzaq wálayatlarında “jasıl” mineral tóginler, cian duzları, kaliy ksantogenat, kaliy sulfat sıyaqlı joqarı qosımsha qunlı ónimler islep shıǵaratuǵın joybarlar iske qosıldı. Bul jańa ónimlerdiń eksportın arttırıwdı házirden esap-sanaq etiw zárúr ekenligi kórsetip ótildi.

Kelesi jılı 4,5 million tonna paxta jetistiriw maqset etilgen.
Onıń ushın fosforlı tóginlerdiń rezervin tayarlaw, tógin islep shıǵarıwshılarǵa jeterli muǵdarda sulfat kislotasın jetkerip beriw wazıypası qoyıldı. Fermerlerdi tógin menen támiyinlew ushın jeńilletilgen kreditler ajıratıw jumısların tezirek baslaw zárúrligi atap ótildi.
Prezidentimiz ximiya sanaatı mámleket ekonomikasındaǵı strategiyalıq tarmaq ekenin atap ótip, ishki bazardı turaqlı támiyinlew, eksport potencialın arttırıw hám jańa jumıs orınların jaratıw boyınsha anıq tapsırmalar berdi.