SUWDÍŃ QÁDIRIN BILEYIK! ONÍ ÚNEMLEW — KELESHEKKE QOSQAN ÚLESIMIZ!
2026-11-18 10:10:00 / Jańalıqlar
Búgingi kúnde suw resursların qorǵaw, olardan únemli hám nátiyjeli paydalanıw, hár bir tamshı suwdıń qádirine jetiw eń áhmiyetli wazıypalardıń birine aylandı.
Búgingi kúnde suw resursların qorǵaw, olardan únemli hám nátiyjeli paydalanıw, hár bir tamshı suwdıń qádirine jetiw eń áhmiyetli wazıypalardıń birine aylandı. Sebebi, suwdıń hátte bir tamshısı da biykarǵa ısırap bolmawı kerek. Óytkeni búgin únemlengen suw — erteńgi mol hasıl, xalıqtıń abadan turmısı hám keleshek áwladlardıń nesiybesi.
Áne usı maqsette Ózbekstan Respublikası Ministrler Kabinetiniń 2026-jıl
21-oktyabrdegi 585-sanlı qararı qabıl etildi. Usı qarar menen suwdan paydalanıw hám suw tutınıw qaǵıydaların buzǵan yuridikalıq shaxslarǵa finanslıq sankciyalardı qollanıw tártibi anıq belgilep berildi.
Qararǵa muwapıq, belgilengen limitten artıq suw alıw, suwdan shártnama dúzbesten paydalanıw, suwdı esapqa alıw ásbapların ornatpastan suw alıw, arnawlı ruxsatnamasız suw paydalanıw, belgilengen tártipti buzǵan halda óz betinshe suw alıw jaǵdaylar nızam buzılıwı dep esaplanadı.
Qarardıń eń áhmiyetli tárepi — suwdan paydalanıw qaǵıydaların buzıwdıń aldın alıw, paydalanıwshılardıń juwapkershiligin arttırıw hám suwdan maqsetli paydalanıw ádetin qáliplestiriwge qaratılǵanlıǵında.
Atap aytqanda, 2027-jıl 1-yanvardan baslap, jıl dawamında birinshi márte qaǵıyda buzılıwına jol qoyılǵan jaǵdayda, yuridikalıq shaxsqa dáslep eskertiw berilip, anıqlanǵan kemshiliklerdi saplastırıw ushın 10 kún múddet beriledi.
Eger berilgen múddet ishinde anıqlanǵan kemshilikler saplastırılmasa, onda finanslıq sankciya qollanıladı.
Al burın finanslıq sankciya qollanılǵannan keyin bir jıl ishinde usıǵan uqsas qaǵıyda buzılıwı qaytalansa, finanslıq sankciya muǵdarı bes ese kóbeytiriledi.
Sonday-aq, qararda finanslıq sankciyalardı tólew boyınsha jeńillikler de názerde tutılǵan. Atap aytqanda, sankciya summasınıń 50 procentin bir ay ishinde tólew arqalı onıń qalǵan bólimin tólewden azat bolıw, sonday-aq belgilengen shártler tiykarında sankciya summasın altı ayǵa shekem bólip tólew múmkinshiligi beriledi.
Húrmetli suw paydalanıwshılar!
Suwdı ısırap etiw ańsat, biraq joǵaltılǵan suwdıń ornın toltırıw qıyın. Sonlıqtan hár birimiz suw resurslarına juwapkershilik penen qarap, olardan aqılǵa muwapıq hám únemli paydalanıwımız kerek.
Suw alıwdıń belgilengen limitlerine ámel eteyik, shártnamalar hám tiyisli ruxsatnamalardı óz waqtında rásmiylestireyik. Suwdı esapqa alıw ásbapların ornatayıq hám zamanagóy suw únemlew texnologiyaların keń qollanayıq.
Sonlıqtan, suwdı únemlew — tek nızam talabı ǵana emes, al hár birimizdiń insanıylıq parızımız hám keleshek áwladlar aldındaǵı juwapkershiligimiz.
Hár bir tamshı suw — ómir deregi! Onı saqlaw hám qádirlew — hár birimizdiń qolımızda!
“Suvxojaliknazorat” inspekciyasınıń
Qaraqalpaqstan Respublikasi basqarması
bas qaniygesi A.Esemuratov
