Jámáátshilikke esabat
2026-04-09 14:55:00 / Media hám basqa ilajlarda basshılar qatnasıwı
Usı jıldıń 7-aprel kúni Prezidentimiz Shavkat Mirziyoevtiń basshılıǵında dene tárbiya hám sport tarawın jańa basqıshqa alıp shıǵıw boyınsha videoselektor májilisi ótkerildi.

Usı jıldıń 7-aprel kúni Prezidentimiz Shavkat Mirziyoevtiń basshılıǵında dene tárbiya hám sport tarawın jańa basqıshqa alıp shıǵıw boyınsha videoselektor májilisi ótkerildi. Onda sport tarawındaǵı jetiskenlikler menen qosa qáte-kemshiliklerdi de atap ótti.
Haqıyqatında da sońǵı jıllarda Húrmetli Prezidentimiz tárepinen tarawdı jańa basqıshqa kóteriw boyınsha bir katar qarar hám pármanlar qabıl etildi. Bulardıń nátiyjesi sıpatında keyingi 9 jıllıqta Moynaq rayonında sport infrastrukturası pútkilley jańalanǵanın atıp ótsek boladı. Sportshılar ushın, jaslar ushın, xalqımız ushın barlık sharayatlar jaratıp berildi. Rayon orayınan baslap eń shetki aymaqtaǵı máhállelerde futbol, voleybol, workout maydanshaları qurıldı, bar sport bazaları abadanlastırıldı, jaslardıń sport penen turaqlı shuǵıllanıwı ushın zárúr sharayatlar jaratıldı.
Videomajiliste Húrmetli Prezidentimiz jaratılǵan usınday sharayatlarǵa múnásip juwap bolmay atırǵanın atap ótti hám bunnan bılay bul tarawdı jańa basqıshqa kóteriw boyınsha anıq tapsırmalar belgilep berdi. Usı uazıypalardan kelip shıǵıp, Moynaq rayonında tarawdı rawajlandırıw boyınsha anıq-rejeler hám jol kartalar islep shıǵıldı. Oǵan bola rayondaǵı hár bir máhállede sport hám salamat turmıs tárizin úgit-násiyatlaytuǵın "salamat turmıs volontyorları" korpusı qáliplestiriledi.
Mekteplerde sport dógerekleriniń jumısın janlandırıw boyınsha anıq ilajlar belgilendi. Endi sport baǵdarındaǵı joqarı oqıw ornı studentleri dual bilimlendiriw tiykarında mekteplerdegi sport dógereklerine biriktiriledi. Bul bolsa tájiriybeli trenerler menen támiyinlew imkaniyatın beredi. Moynaq rayonındaǵı barlıq mekteplerde sport dógerekleriniń tolıq jumıs alıp barıwı, qamtıp alıw keskin arttırılıwı támiyinlenedi.
Prezidentimiz tárepinen alǵa qoyılǵan "Máhálle - mektep - sport mákemesi - federaciya" shınjırı tiykarında islew sisteması rayonda tolıq engiziledi. Qábiletli jaslardı máhálleniń ózinen anıqlap, sport mekteplerine baǵdarlaw boyınsha selekciya jumısları kúsheytiledi.
Májiliste kross-fit sıyaqlı arnawlı infrastruktura talap etpeytuǵın sport túrlerin ǵalaba en jaydırıw boyınsha berilgen tapsırmalar da rayonda basqıshpa-basqısh ámelge asırıladı. 1-mayǵa shekem barlıq mektep hám texnikumlarda kross-fit dógerekleri shólkemlestiriledi.
Sonday-aq, rayondaǵı kárxana hám shólkemlerde hápteniń juma kúni sport kúni sıpatında jolǵa qoyıldı. Basshılar jeke úlgi bolıp, xızmetkerlerdiń sport penen shuǵıllanıwı ushın sharayat jaratpaqta. Jıl dawamında keminde 4 sport túri boyınsha jarıslar shólkemlestiriledi.
Isbilermenlerdi sportqa keńnen tartıw da tiykarǵı wazıypa etip belgilendi. Endi sport obektlerin qurıw hám úskenelewge qaratılǵan qárejetler ushın berilgen salıq jeńilliklerinen belsene paydalanıladı. Rayonımız isbilermenleri menen birgelikte jańa sport maydanshaları, jabıq obektler shólkemlestiriw rejelestirilgen.
Prezidentimiz tárepinen sport medicinası, sportshılardıń salamatlıǵın qadaǵalaw máselesine ayrıqsha itibar qaratılǵanı sebepli, rayondaǵı sportshılardı medicinalıq tekseriwden ótkeriw, olardıń fizikalıq júklemesin ilimiy tiykarda qadaǵalaw sisteması jolǵa qoyıladı.
Sonday-aq, sport nátiyjeliligin sanlastırıw, jasalma intellekt tiykarında sportshı hám trenerlerdiń jumısın tallaw sistemasınıń engiziletuǵını belgilendi. Bul bolsa Moynaq rayonında da sporttı basqarıwdıń zamanagóy usılların qollanıw imkaniyatın beredi.
Eń baslısı, Prezidentimiz tárepinen qoyılǵan wazıypa - bıyılǵı jılı sport penen turaqlı shuǵıllanıwshılar sanın 2 esege arttırıw - Moynaq rayonı ushın da anıq maqset sıpatında belgilep alındı. Hár bir máhálle, hár bir mektep, hár bir shólkem bul processte belsene qatnasadı.
Prezidentimiz Shavkat Mirziyoevtiń basshılıǵında dene tárbiya hám sport tarawın jańa basqıshqa alıp shıǵıw boyınsha ótkergen videoselektor májilisinde belgilep berilgen tapsırmaların sozsiz orınlauga kepillik beremiz.
Berilgen intervyude mine usılar sóz etildi.
