Qaraqalpaqstan Respublikası Moynaq rayonı hákimligi

Búgin Moynaq orayına kiriwde ornatılǵan ápsanalıq AN-2 samolyotı haqqında sóylesemiz. Kópshilik bul samolyottı tek ǵana estelik dep qabıl etedi. Negizinde bolsa ol pútkil bir dáwir, pútkil bir áwladtıń ómirin ózinde jámlegen belgi. - Sonıń ushın, dáslep sonı soramaqshıman. Búgingi jaslar AN-2 samolyotın tek estelik sıpatında ǵana kóredi. Siziń eske túsiriwlerińizden málim bolıwınsha, ol Moynaq xalqı ushın ápiwayı transport emes, al turmıs tárizi bolǵan. Sizińshe, ne ushın áyne AN-2 samolyotı Moynaq tariyxınıń tımsalına aylandı? Qaraqalpaqstan Respublikası Joqarǵı Keńesiniń deputatı Biybixan Utambetova: - Moynaqqa kirip kiyatırǵan hár bir jolawshı oraydaǵı AN-2 samolyotın kórip hayran qalıwı múmkin. Negizinde bolsa bul samolyot Moynaqtıń úlken tariyxın ózinde sáwlelendiredi. Balalıǵımızda hár tań saat jetide onıń gúrildegen dawısı menen oyanatuǵın edik. Saat 07:20 daǵı reys Moynaqtan Nókiske ushatuǵın edi. Sol dáwirde avtobus qatnawları derlik bolmaǵanı ushın AN-2 hár kúni tórt márte Moynaq hám Nókis arasında qatnap, adamlardıń tiykarǵı transportına aylanǵan edi. Studentlik jıllarım, miymanlarımızdıń keliwi, tuwısqanlarımızdıń úyine barıwımız - hámmesi usı samolyot penen baylanıslı. Sonıń ushın AN-2 biz ushın ápiwayı texnika emes, al turmısımızdıń ajıralmas bir bólegi edi. - Siziń gúrrińizde AN-2 tek ǵana jolawshılardı emes, al Moynaqtıń ekonomikasın da baylanıstırıp turǵanı seziledi. Ásirese, konserva kombinatı ónimleriniń hawa jolı arqalı tasılǵanı, alıs awıllardıń oray menen baylanısı támiyinlengeni sol dáwir infrastrukturasınıń qanshelli áhmiyetli bolǵanın kórsetedi. Sol jıllardaǵı aeroport turmısı hám samolyottıń ekonomikalıq áhmiyeti haqqında jáne qanday esteliklerińiz bar? B.Utambetova: - Keyin ala bilgenimizdey, samolyot ishinde jumsaq hám qattı orınlıqlar bolǵan. Qattı orınlıqlar ornına konserva kombinatında islep shıǵarılǵan ónimler Nókiske jetkerilgen. Aeroport kishi bolsa da, óziniń bufeti, kassası hám jıllı ortalıǵı bar edi. Hawa rayınıń ózgermeli bolıwına baylanıslı reysler geyde keshigip turdı. Sonda aeroport bufetinde shay iship kútken kúnlerimiz ele yadımızda. AN-2 tek Moynaq penen Nókisti ǵana emes, bálkim Qońırat, Aspantay, Qazaqdárya, Shege, Porlıtaw awılların da baylanıstırıp turǵan. Ol adamlardı, azıq-awqattı, ónimlerdi hám eń áhmiyetlisi, insanlardı bir-birine jaqınlastırǵan transport edi. Búgin Prezidentimizdiń baslaması menen Moynaq aeroportı zamanagóy kóriniske iye boldı, jańa samolyotlar qatnawı jolǵa qoyıldı. Biraq orayǵa AN-2 samolyotınıń ornatılıwı ótmishke húrmet belgisi sıpatında da úlken mániske iye. - Sizińshe, bul estelik keleshek áwladqa qanday xabar jetkeredi? B.Utambetova: - Búgingi samolyotlar, álbette, bir qansha qolaylı hám tez. Nókiske 25 minutta jetip baramız. Biraq AN-2 biz ushın tariyx. Ol Moynaqtı dúnya menen baylanıstırǵan, mıńlaǵan insanlardıń táǵdirinde iz qaldırǵan samolyot. Onı estelik sıpatında ornatıw arqalı jaslarımız ata-anaları hám ata-babaları qanday sharayatlarda jasaǵanın, qanday transporttan paydalanǵanın bilip aladı. Bul samolyot Moynaqtıń ótmishi, búgini hám keleshegin baylanıstırıp turıwshı simvol sıpatında qádirlenedi. Ol bizge tariyxtı umıtpawdı, rawajlanıwdı qádirlewdi hám Watanımızdıń rawajlanıwı ushın shúkirshilik etiwdi esletip turadı. AN-2 samolyotı mine usınday umıtılmas estelikler menen moynaqlılardıń júreginen tereń orın alǵan. Sonıń ushın da ol rayon orayına ornatıldı. Búgingi kúnde bul jer rayon xalqı, keliwshi miymanlar hám turistler ushın súyikli mánzillerden birine aylanǵan. Olar bul jerde mashinadan túsip, estelik súwretleri hám selfilerge túsedi. Biraq AN-2 tek ǵana selfi ushın mólsherlengen obiekt emes, al Moynaqtıń bay tariyxı, xalıqtıń awır hám maqtanıshlı ómir jolı, áwladlar esteligi jáne ótmish penen búgindi baylanıstırıp turıwshı tiri belgi sıpatında qádirlenedi. Sonday-aq, Moynaqtıń tariyxın sózsiz sóyleytuǵın, hár bir moynaqlıqtıń balalıǵı, saǵınıshı hám eske túsiriwlerin ózinde jámlegen tariyxıy tımsal bolıp esaplanadı. Sáwbetlesken: Dariǵa Ablaeva, Moynaq rayonı hákiminiń Málimleme siyasatı máseleleri boyınsha másláhshisi