Korrupciyaǵa qarsı gúres - turaqlı rawajlanıw kepili
2025-04-17 16:00:00 / Министрлик
Ilajda rayonlıq Keńestiń baslıǵı U.Karimov shıǵıp sóylep, usı jıldıń 5-mart kúni bolıp ótken Korrupciyaǵa qarsı gúresiw boyınsha Milliy keńestiń keńeytilgen májilisinde alǵa qoyılǵan baslamalar hám wazıypalar haqqında tolıq maǵlıwmat berdi. Bul májiliste korrupciya illetine qarsı gúresiw baǵdarındaǵı jańa qatnaslar, shólkemlestiriwshilik-huqıqıy mexanizmler hám jámiette salamat pikirdi engiziwge qaratılǵan ilajlar ayrıqsha atap ótilgeni atap ótildi.
Dógerek sáwbeti dawamında korrupciyanıń mámlekettiń sociallıq-ekonomikalıq rawajlanıwına keltirip atırǵan unamsız tásiri, onıń barlıq tarawlarda júzege keltiriwi múmkin bolǵan aqıbetleri haqqında hár tárepleme sóz etildi. Qatnasıwshılar korrupciyaǵa qarsı gúresiwde hár bir puqaranıń juwapkershiligi, huqıqıy sana-sezim hám huqıqıy mádeniyattı arttırıwdıń áhmieti haqqında pikir alıstı.
Sonıń menen birge, dúnyadaǵı áhmietli jámietlik-siyasiy processler hám olardıń korrupciyaǵa qarsı gúresiwdegi ornı haqqında da maǵlıwmatlar berildi.
Ilaj qatnasıwshıları óz-ara pikirlesiwde belsene qatnasıp, ózlerin qızıqtırǵan sorawlarǵa juwap aldı hám huqıqıy bilimlerin jáne de bayıttı.
Bunday ilajlar jas áwlad sanasında hadallıq, ádillik hám nızamlılıq principlerin bekkemlewde, sonday-aq, puqaralardıń belsendi puqaralıq poziciyasın qáliplestiriwde úlken áhmietke ie.