"Aǵartıwshılıq jámiyeti — kúshli mámleket"
2026-11-18 12:10:00 / Jańalıqlar

"Aǵartıwshılıq jámiyeti — kúshli mámleket"
16-noyabr — Xalıqaralıq keńpeyillik kúni múnásibeti menen Ellikqala rayonlıq málimleme-kitapxana orayında oqıwshı-jaslar qatnasıwında "Birden-bir Ózbekstan kitap hám kitapxanadan baslanadı" súreni astında dógerek sáwbeti ótkerildi.
Ilajda Respublikalıq Ruwxıy-aǵartıwshılıq orayı Ellikqala rayonlıq bóliminiń baslıǵı A.Matniyazova, Ellikqala rayonı Din isleri boyınsha bas qánigesi E.Allabergenov, úgit-násiyatlaw toparınıń baslıǵı D.Sharipova, Málimleme-kitapxana orayınıń direktorı M.Djumaniyazova hám oqıwshı-jaslar qatnastı.
Dógerek sáwbetinde keńpeyillik, milletleraralıq tatıwlıq, dinleraralıq awızbirshilik, óz-ara húrmet hám miyrim-shápáát sıyaqlı iygilikli qádiriyatlardıń jámiyetlik turmıstaǵı áhmiyeti haqqında hár tárepleme sóz etildi.
Ilaj dawamında kitaptıń insan ruwxıylıǵın joqarılatıw, dúnyaqarasın keńeytiw hám jaslardı jaqsı pazıyletler ruwxında tárbiyalawdaǵı ornı haqqında pikir-usınıslar bildirildi.
Ilaj jaslar qálbinde milletleraralıq doslıq, keńpeyillik, awızbirshilik hám kitapqumarlıq mádeniyatın jáne de bekkemlewge xızmet etti.



