«Doslıq» festivali — keńpeyillilik hám birlik bayramı
2026-07-27 09:10:00 / Jańalıqlar
«Doslıq» festivali — keńpeyillilik hám birlik bayramı
30-iyul — Xalıqlar doslığı kúni múnásibeti menen elimiz boyınsha ótkerilip atırǵan «Doslıq» festivali sheńberinde Qaraqalpaqstan Respublikası Ellikqala rayonı Shuqırqoq máhallesinde «Ózbekstan — birden-bir Watan» shıgarı astında ruwxıy-аǵartıwshılıq ilajı shólkemlestirildi.
Ilajdı rayon hákiminiń orınbasarı O.Atajanov ashıp berip, bárisın de atap ótilip atırǵan sáne múnásibeti menen qutlıqladı.
Ilajda máhalla puqaralar jıyını baslıqları, mekemeler hám shólkemler wákilleri, nuranıylar, jaslar, túrli millat hám elat wákilleri, sonday-aq keń jurtshılıq qatnastı.
Ilaj dawamında sózge shıqqanlar elimizde ústemlik etip atırǵan tınıshlıq, millatlararası tatıwlıq hám diniy keńpeyillilik ortalığın Jańa Ózbekstannıń rawajlanıwındaǵı eń áhmiyetli faktorlarınıń biri retinde atap ótip, elimizde jasap atırǵan barlıq millat hám elat wákilleri ushın Ózbekstan birden-bir hám ortaq Watan ekenligin ayrıqsha atap ótti.
Bayram dástúri sheńberinde túrli millat wákilleri tárepinen milliy qosıqlar hám ásem bilewler orınlandı, xalıqlar arasındaǵı doslıq, birlik hám ózara húrmet ideyaları jırlanıp, bayram kóterinki kóńil kúyde ótti. Sonday-aq, xalıq ushın arzanlastırılǵan azıq-awqat ónimleri jármeńkesi shólkemlestirilip, qatnasıwshılar ushın qolaylıqlar jaratıldı.
«Doslıq» festivali xalqımızdıń ásirler dawamında qáliplesken keńpeyillilik, ózara húrmet hám ahıllıq sıyaqlı izgi qádiriyatların jáne de bekkemlewge, jámiyetimizde millatlararası tatıwlıq penen puqaralar birligin keńinen nasıyxatlawǵa qızmet etetin áhmiyetli ruwxıy-аǵartıwshılıq ilajlarınıń biri boldı.
Ellikqal’a tumani hokimligi axborot xizmati.