Ellikqala rayonında awıl xojalıǵı tarawındaǵı áhmietli wazıypalar dodalandı
2026-07-06 11:45:00 / Jańalıqlar
Ellikqala rayonında awıl xojalıǵı tarawındaǵı áhmietli wazıypalar dodalandı
Ellikqala rayonı hákimliginiń úlken májilisler zalında rayon hákimi Valijan Niyazımbetovtıń basshılıǵında awıl xojalıǵı tarawına baǵıshlanǵan májilis bolıp ótti.
Májiliste rayondaǵı paxtashılıq hám ǵálleshilik baǵdarında jumıs alıp barıp atırǵan fermer xojalıqlarınıń basshıları, awıl xojalıǵı tarawınıń juwapkerleri hám tiyisli shólkemlerdiń juwapkerleri qatnastı.
Májilis dawamında ǵawashanı tárbiyalawǵa ayrıqsha itibar qaratıw, atızlardı jabayı shóplerden óz waqtında tazalaw, barlıq agrotexnikalıq ilajlardı belgilengen múddetlerde hám sapalı ámelge asırıw, suwǵarıw jumısların nátiyjeli shólkemlestiriw máseleleri hár tárepleme dodalandı.
Sonday-aq, jetistirilip atırǵan zúráátti zaya etpey jıynap-terip alıw maqsetinde terim kombaynların óz waqtında tartıw, jıyın-terim máwsimine puqta tayarlıq kóriw boyınsha tiyisli tapsırmalar berildi.
Májiliste fermerlerdi qıynap atırǵan mashqalalar hám olardıń sheshimleri de dodalanıp, juwapkerlerge hár bir másele boyınsha ámeliy ilajlar kóriw hám tarawdaǵı jumıslardıń nátiyjeliligin bunnan bılay da arttırıw boyınsha anıq wazıypalar júklendi.