Puqaralardıń múrájatları itibar orayında
2026-06-11 11:30:00 / Jańalıqlar
Puqaralardıń múrájatları itibar orayında
Puqaralardıń múrájatların tıńlaw, olardı qıynap kiyatırǵan mashqalalarǵa sheshim tabıw hám xalıq penen ashıq pikirlesiwdi támiyinlew maqsetinde Ellikqala rayonında basshılardıń jeke qabıllawları turaqlı shólkemlestirilmekte.
Búgin rayonlıq Xalıq qabıllawxanası imaratında rayon hákiminiń birinshi orınbasarı B.Alimovtıń gezektegi jeke qabıllawı bolıp ótti.
Qabıllaw dawamında puqaralar tárepinen tiykarınan bántlikti támiyinlew, kishi isbilermenlik jumısın jolǵa qoyıw ushın jeńilletilgen kredit alıw, jumıs penen támiyinlew hám basqa da sociallıq máseleler boyınsha múrájatlar bildirildi.
Hár bir múrájat hár tárepleme kórip shıǵılıp, nızamshılıq sheńberinde túsinikler berildi. Múrájatlardıń bir bólegi ornında unamlı sheshilgen bolsa, qosımsha úyreniwdi talap etetuǵın máseleler boyınsha tiyisli shólkemler hám juwapkerlerge anıq wazıypalar júklendi.
Puqaralar menen ashıqtan-ashıq sóylesiw, olardıń mashqala hám usınısların tıńlaw jáne ámeliy járdem kórsetiwge qaratılǵan bunday qabıllawlar xalıqtıń razılıǵın támiyinlew hám aymaqtı bunnan bılay da rawajlandırıwǵa xızmet etpekte.