Ellikqala rayonında gezektegi dóretiwshilik joybarı paydalanıwǵa tapsırıldı.
2026-06-01 15:15:00 / Jańalıqlar
Ellikqala rayonında gezektegi dóretiwshilik joybarı paydalanıwǵa tapsırıldı.
Ózbekstan Respublikası Prezidentiniń 2024-jıl 20-dekabrdegi 223-sanlı Pármanı tiykarında aymaqlardıń ekonomikalıq potencialın arttırıw, xalıqtıń bántligi hám dáramatların kóbeytiwge qaratılǵan reformalar izbe-iz ámelge asırılmaqta. Usı wazıypalardıń orınlanıwı sheńberinde Ellikqala rayonında joybar bahası 4,2 milliard sum bolǵan "Ellikqala" kanalınıń 2,2 kilometrlik bóleginde jaǵalıq boyı xızmetlerin shólkemlestiriw joybarı tabıslı juwmaqlandı.
Joybar sheńberinde zamanagóy infrastruktura jaratılıp, 3 kilometr piyadalar jolı qurıldı, 200 dana dekorativ jaqtılandırıw shıraqları ornatıldı, 5,3 kilometr temir panjaralar tartıldı hám 3 piyadalar kópiri qurıldı. Nátiyjede rayon orayında xalıqtıń dem alıwı, seyil etiwi hám bos waqtın mazmunlı ótkeriwi ushın qolaylı orın jaratıldı.
Búgin usı obekttiń saltanatlı ashılıw máresimi bolıp ótti. Onda Ellikqala rayonı hákiminiń birinshi orınbasarı B.Alımov, tiyisli shólkemlerdiń basshıları, nuranıylar, jaslar hám keń jámiechilik wákilleri qatnastı.
Atap ótilgenindey, bul joybar tek ǵana aymaqtıń kórkine kórik qosıp qoymastan, al xızmet kórsetiw tarawın rawajlandırıw, jańa jumıs orınların jaratıw hám isbilermenlik jumısın keńeytiwge xızmet etedi. Joybardıń tolıq iske túsiriliwi nátiyjesinde 50 jańa jumıs ornı jaratılıwı hám xızmet kórsetiw baǵdarında qosımsha dáramat dárekleriniń qáliplesiwi kútilmekte.
Jańa jaǵalıq boyı aymaǵı Ellikqala xalqınıń súyikli mákanlarınan birine aylanıp, rayonnıń rawajlanıwı hám xalıqtıń abadanlıǵın arttırıwǵa múnásip úles qosadı.