ТURAQLI RAWAJLANIW JOLINDAǴI BASLAMALAR
2026-04-23 15:45:00 / Jańalıqlar
ТURAQLI RAWAJLANIW JOLINDAǴI BASLAMALAR
Jaqında Qazaqstanda bolıp ótken Regionallıq ekologiyalıq sammitte Húrmetli Prezidentimiz Shavkat Mirziyoyevtiń shıǵıp sóylegen sózin dıqqat penen tıńladım hám bul shıǵıp sóylegen sózinde bildirilgen pikirler mende tereń tásir qaldırdı. Prezidenttiń shıǵıp sóylegen sózinde Oraylıq Aziyadaǵı ekologiyalıq jaǵdaydı qalıs hám obyektiv bahalaw, global ısıwdıń regionımızǵa tásirin anıq hám ayqyn kórsetip beriw úlken áhmiyetke iye ekeni ashıq kórindi.
Húrmetli Prezidentimiz atap ótken jaǵdaylardaǵı áhmiyetli máselelerden biri sonnan ibarat, ekologiyalıq mashqalalardı global klimat ózgeriwinen ajıratıp kórip bolmaydı hám rawajlanıp atırǵan mámleketler ushın aldınǵı texnologiyalar, qarjılandırıw hám innovatsiyalarǵa teńdey kiriw imkaniyatı jaratılıwı zárúr. Bul pikir tek ǵana ekologiya tarawında emes, al ulıwma turaqlı rawajlanıw hám sotsiallıq abadanlıqtı támiyinlewde de úlken áhmiyetke iye.
Ózbekstannıń “Jasıl mákan” joybarı sheńberinde derlik bir milliard terek hám puta egilip, Aral teńiziniń qurıǵan ultanında 2 million gektardan aslam jerde toǵayzarlar jaratıldı. Sonday-aq, suwdı únemlew ilajları hám “jasıl” energetika úlesi de keńeydi. Bul ilajlar tek ǵana ekologiyalıq nátiyjelilikti arttırıp qoymastan, al ekonomikalıq rawajlanıw, sotsiallıq turaqlılıq hám texnologiyalıq jańalanıwǵa da xızmet etedi.
Sonday-aq, shıǵındılardan energiya islep shıǵarıw hám jańa zavodlardıń jumısın jolǵa qoyıw regionda ekologiyalıq nátiyjelilikti jáne de kúsheytiw, milliardlaǵan kilovatt-saat elektr energiyasın islep shıǵarıw hám millionlaǵan tonna shıǵındını utilizatsiyalaw imkaniyatın beredi. Bul mısallar Prezidentimiz baslamalarınıń ámeliy nátiyjeliligin kórsetedi.
Regionallıq atlas jaratıw, biologiyalıq hár túrlilikti saqlaw ushın “Oraylıq Aziya Qızıl kitabı”n tayarlaw hám jaslardı ekologiyalıq jumısqa tartıw arqalı regionda ekologiyalıq mádeniyattı rawajlandırıw rejelestirilgen. Prezident Pútkil jer júzilik jaslar klimat forumın Ózbekstanda ótkeriw usınısın da alǵa qoydı.
Prezidenttiń regionallıq birge islesiw, jaslar hám jámiyetti ekologiyalıq jumısqa tartıw jáne turaqlı rawajlanıw jolındaǵı baslamaları tek ǵana ruwhlandırısıwshı emes, al ámeliy áhmiyetke iye.
Xajibay SATLIKOV,
Ózbekstan Xalıq demokratiyalıq partiyası Ellikqala rayonlıq keńesiniń baslıǵı