Ana súti - náreste salamatlıǵınıń eń áhmietli dáregi
2026-03-06 14:00:00 / Jańalıqlar
Ana súti - náreste salamatlıǵınıń eń áhmietli dáregi
Ana súti jańa tuwılǵan náreste ushın eń tábiyǵıy hám eń paydalı azıq bolıp esaplanadı. Medicina qánigeleriniń atap ótiwinshe, ómiriniń birinshi aylarında balanıń salamat ósiwi hám rawajlanıwı kóp tárepleme ana sútine baylanıslı. Ana súti quramında náreste organizmi ushın zárúr bolǵan beloklar, vitaminler, maylar, mineral zatlar hám de immunitetti bekkemlewshi zatlar bolıp, olar balanıń salamat ósiwine járdem beredi.
Ana sútiniń eń úlken abzallıqlarınan biri sonda, ol balanı hár qıylı infekciyalıq keselliklerden qorǵaydı. Ana sútinde bar bolǵan qorǵawshı elementler náreste immun sistemasın bekkemlep, organizmdi keselliklerge shıdamlı etedi. Sol sebepli qánigeler náresteni keminde dáslepki altı ay dawamında tek ǵana ana súti menen awqatlandırıwdı usınıs etedi.
Bunnan tısqarı, emiziw procesi ana hám bala arasındaǵı mehir hám jaqınlıqtı jáne de bekkemleydi. Bul bolsa balanıń ruwxıy rawajlanıwına da unamlı tásir kórsetedi. Ana súti bárqulla taza, tayar hám balanıń mútájligine say bolǵan azıq esaplanadı.
Ana ushın da emiziwdiń paydası úlken. Emiziw procesi ana organizminiń tezirek tikleniwine járdem beredi hám ayırım keselliklerdiń rawajlanıwınıń aldın alıwǵa xızmet etedi. Sonday-aq, bul process ananıń perzenti menen mehirli baylanısın jáne de bekkemleydi.
Juwmaqlap aytqanda, ana súti - náreste ushın eń bahalı hám biybaha jemis bolıp esaplanadı. Hár bir ana perzentiniń salamat ósip-órbiwi ushın imkanı bolǵanınsha onı ana súti menen azıqlandırıwǵa itibar qaratıwı áhmietli. Bul tek ǵana balanıń densawlıǵın bekkemlep qoymastan, al salamat áwladtı tárbiyalawǵa da xızmet etedi.
Ellikqala rayonı Medicina birlespesi tuwıw bólimi miyirbiykesi Gulayım YUsupova