Qaraqalpaqstan Respublikası Ellikqala rayonı hákimligi

AIV infekciyası - jámiet salamatlıǵı ushın áhmietli másele

Búgingi kúnde dúnyada keń tarqalǵan infekciyalıq keselliklerden biri AIV infekciyası bolıp esaplanadı. AIV - adam immun jetispewshiligi virusı bolıp, ol insan organizmine kirip, immun sistemasınıń iskerligin izden shigaradı. Bul virus organizmniń keselliklerge qarsı gúresiw qábiletin áste-aqırın hálsiretedi. Eger waqtında anıqlanıp emlenbese, kesellik keyin ala AIJS basqıshına ótiwi múmkin.

AIV infekciyası tiykarınan ziyanlangan biologiyalıq suyıqlıqlar arqalı juģadı. Eń kóp ushırasatuǵın juǵıw jolları - qorǵalmaǵan jınısıy qatnas, zıyanlanǵan qan arqalı, bir mártelik bolmaǵan shpriclerden paydalanıw hám de anadan balaǵa hámiledarlıq, tuwıw yamasa emiziw waqtında juǵıw bolıp tabıladı. Sol sebepli medicina mákemelerinde sanitariyalıq-gigienalıq qaǵıydalarǵa qatań ámel etiw hám tek ǵana steril medicinalıq ásbap-úskenelerden paydalanıw áhmietli esaplanadı.

Sonı da ayrıqsha atap ótiw kerek, AIV kúndelikli baylanıs arqalı juqpaydı. Mısalı, qol berip kórisiw, qushaqlasıw,

 bir ıdıstan awqatlanıw, bir jerde islew yamasa oqıw arqalı virus juqpaydı. Sonıń ushın AIV benen jasap atırǵan insanlarǵa durıs múnásibette bolıw hám olardı jámiyetten ajıratıp qoymaw áhmietli.

Qánigeler AIV infekciyasınıń aldın alıw ushın xalıqtıń medicinalıq mádeniyatın arttırıw, salamat turmıs tárizine ámel etiw, tosattan qáwipli baylanıslardan saqlanıw hám medicinalıq tekseriwlerden turaqlı ótip turıwdı usınıs etedi. Zárúr jaǵdaylarda VICh-testin tapsırıw arqalı kesellikti erte anıqlaw da múmkin.

Juwmaqlap aytqanda, AIV infekciyası awır kesellik bolsa da, durıs maǵlıwmatqa ie bolıw, profilaktika ilajlarına ámel etiw hám medicinalıq másláhátlerdi orınlaw arqalı onıń tarqalıwın azaytıw múmkin. Hár bir insan óz salamatlıǵına juwapkershilik penen qatnasta bolsa, jámiette bul keselliktiń aldın alıwǵa úlken úles qosadı.

Ellikqala rayonlıq medicina birlespesi, tuwıw úyi bóliminiń miyirbiykesi Zulfiya Kurbanova