Jańa turaq jayǵa ie bolǵan jaslardıń quwanıshı
2025-10-08 15:55:00 / Министрлик
Jetim hám ata-ana qaramaǵınan ayırılǵan balalardı turaq jay menen támiyinlew boyınsha Ózbekstan Respublikası Ministrler Kabinetiniń qararına tiykarlanıp, Beruniy rayonı "Insan" sociallıq xızmetler orayı tárepinen eki er jetken ata-ana qaramaǵınan ayırılǵan balalarǵa turaq jay berildi. Olardı turaq jay menen támiyinlew, turmısqa tayarlaw hám qolaylı sharayatlar jaratıw baǵdarında bir qansha ámeliy jumıslar alıp barılmaqta. Búgin Beruniy rayonı hákiminiń orınbasarı D.Karimov hám "Insan" sociallıq xızmetler orayı rayonlıq bóliminiń baslıǵı F.Primov Prezidentimizdiń atalarsha ǵamqorlıǵınıń úlgisi bolǵan turaq jaylardı óz ielerine saltanatlı túrde tapsırdı. 19 jasqa tolǵan Karimov Behzod ıqsham turaq jayǵa ie bolǵanınan quwanıshlı. Huqıqtanıw baǵdarında joqarı bilimlendiriwge kiriw tileginde ekenligin, keleshekte elimizge paydası tietuǵın kadr bolıp jetilisiw nietinde ekenligin bildirdi. Dilbar Kojanova 6 jasında ata-anasınan ayırılıp, apasınıń qaramaǵında qalǵan. Tigiwshilik ónerine qızıǵadı. Oǵan berilgen úy barlıq zamanagóy sharayatlarǵa ie bolıp, jasaw ushın qolaylıqlar tolıq jaratılǵan. Mámleket basshısı tárepinen jaslarǵa qaratılıp atırǵan ǵamqorlıq hám itibar ushın óz minnetdarshılıqların bildirdi.