"Sanlı sud" koncepciyası - sudlar jumısında túpkilikli burılıs.
2025-09-03 19:55:00 / Министрлик
"Sanlı sud" koncepciyası - sudlar jumısında túpkilikli burılıs.
Ózbekstan Respublikası Prezidentiniń 2025-jıl 21-avgusttaǵı "Sudlardıń jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı qosımsha ilajlar haqqında"ǵı 140-sanlı Pármanı sudlardıń jumısındaǵı áhmietli hújjet boldı. Pármanda sudlardıń jumısına jasalma intellekt texnologiyaların engiziw hám sanlastırıw processlerin jedellestiriw, sonday-aq, sudlarda puqaralar hám isbilermenlik subektleri ushın qolaylı sharayatlar jaratıp beriwdiń kelesi jıllardaǵı tiykarǵı maqsetleri etip tómendegiler belgilenip, sud islerin júrgiziwde qaǵaz túrinen waz keshiw maqsetinde "Sanlı sud" koncepciyası tiykarında islerdi júrgiziwdi basqıshpa-basqısh tolıq elektron túrge ótkeriw; puqaralar hám isbilermenlik subektlerine kórsetiletuǵın interaktiv elektron xızmetlerdiń túrlerin arttırıp barıw, sud hújjetlerinen nusqa alıw, sud isleri menen tanısıw, arzanıń sudqa tiyisliligin hám sudlawǵa tiyisliligin anıqlaw, jasalma intellekt járdeminde sud qárejetlerin esaplaw imkaniyatın jaratıw, sonday-aq, sud tárepinen qadaǵan etilgen dárekler hám kontentlerdiń elektron reestrin júrgiziw; sudlardıń jumısına jasalma intellekt texnologiyaların engiziw ushın zárúr texnikalıq infrastruktura jaratıw, sonday-aq, bul baǵdardaǵı normativlik-huqıqıy bazanı jetilistiriw boyınsha ilajlar kóriw; "Sanlı sud" koncepciyası tiykarında basqıshpa-basqısh sud májilisleri zalların shólkemlestiriw jáne xalıq hám sudyalar ushın qolaylı hám zamanagóy sharayatlar jaratıw, sonday-aq, sudyalar hám sud xızmetkerleriniń sociallıq qorǵalıwın kúsheytiw maqsetleri belgilengen. Nátiyjede, puqaralar yamasa isbilermenlik subektleri sudqa arza beriwden aldın jasalma intellekt járdeminde sud dodalawınıń shama menen nátiyjesi hám jumsalatuǵın qárejetler qáliplestiriledi; múrájatlar sudqa elektron túrde jiberiledi; iske qatnasıwshı shaxslar sud imaratına barmaydı hám sud dodalawlarında aralıqtan turıp qatnasadı; tárepler hám iske qatnasıwshı basqa da shaxslarǵa sud processlerinde iske baylanıslı barlıq materiallar menen elektron túrde tanısıw imkaniyatı jaratıladı; sud qárejetleri elektron túrde esaplanadı hám tólenedi, sonday-aq, orınlaw qaǵazları avtomatikalıq túrde orınlawǵa jiberiledi; sud isleri zamanagóy málimleme texnologiyalarınan paydalanǵan halda tolıq elektron túrde júrgiziledi; jasalma intellekt járdeminde sud májilisleriniń protokolları real waqıt rejiminde tekst túrinde tayar sud hújjetleri joybarları avtomatikalıq túrde qáliplestiriledi.
Bunnan tısqarı Pármanda sudlardıń jumısın sanlastırıw, sudlarda jumıslardı kóriwdi ápiwayılastırıw, puqaralar hám isbilermenlik subektlerine sudlarǵa múrájat etiwde jáne jumıslarda qatnasıwda kóplegen qolaylıqlar jaratıw maqsetinde kóplegen wazıypalar belgilengen.
Xudaybergenova Raxima Baltabaevna.
Qaraqalpaqstan Respublikası hákimshilik sudınıń sudyası