Qaraqalpaqstan Respublikası Beruniy rayonı hákimligi

Ábiw Rayxan Beruniy atındaǵı 3-Xalıqaralıq ARBICHO ximiya olimpiadası qatnasıwshıları yaǵnıy 17 mámleketten kelgen 120 dan aslam oqıwshılar 3-10-noyabr kúnleri Nókis qalasında xalıqaralıq olimpiadada bellesedi. Kúni keshe qatnasıwshılar Ábiw Rayxan Beruniy tuwılıp ósken jer, áyemgi Kat qalası házirgi Beruniy rayonına bardı.

Dáslep miymanlar Beruniy babamızdıń monumental esteligine gúlsheńber qoyıp, húrmet kórsetti. Rayon hákimi Ikram Xidirov olimpiada qatnasıwshıların Qaraqalpaqstan jerinde, xalıqaralıq olimpiadadaǵı qatnasıwı menen qutlıqladı. Miymanlardıń keyingi mánzili Aziya saltanatlar úyinde qızıqlı viktorina menen dawam etti. Ábiw Rayxan Beruniydiń ashılıwları hám ilimiy kózqarasları haqqında tariyx ilimleriniń doktorı, professor, Qaraqalpaqstan Respublikası Joqarǵı Keńesiniń deputatı Yaqshıbiyke Abdullaeva bayanat jasadı hám olimpiada qatnasıwshılarına áwmet tiledi. 17 mámleket hám túrli tillerde sóylesetuǵın dúnya jasların, bir maqset ilim jolındaǵı umtılıs, izleniwsheńlik hám jańa ideyalar birlestirdi.

Ata-babalarımız ullı jipek jolın basıp ótip, bilim izlegen jollardan endi perspektivalı jas ilimpazlar qádem taslap kelmekte. Bunday abıraylı olimpiadanıń Qaraqalpaqstanda bolıp ótiwiniń de ózine tán mánisi bar. Abu Rayxan al Beruniydiń tuwılǵan jerine keliwi bolsa, ullı alımnıń ilimine kórsetilgen sheksiz húrmet bolıp tabıladı. Jańa Ózbekstanda Úshinshi Renessans dáwirin bilimli jaslar menen qurıwdı baslaǵan ekenbiz, álbette, bul jolda dúnya jasları menen básekilese alatuǵın áwladtı tárbiyalaw, olarǵa zamanagóy bilim beriw hár birimizdiń juwapkershilikli wazıypamız esaplanadı.

Elimizde úshinshi márte ótkerilip atırǵan xalıqaralıq olimpiadada Ázerbayjan, Kosta-Rika, Gruziya, Izrail, Iordaniya, Qazaqstan, Qırǵızstan, Malayziya, Mongoliya, Qatar, Rossiya, Saudiya Arabstanı, Tájikstan, Tailand, Túrkiya, Túrkmenstan mámleketlerinen kelgen jáne Ózbekstan wákillerinen ibarat eń qábiletli oqıwshı-jaslar ximiya páninen óz-ara bellesti.