Korrupciyaǵa baylanıslı nızam hújjetleri mazmun-mánisi
2026-09-24 12:05:00 / Министрлик
Korrupciya - bul jámiyetke túrli jollar menen tásir etetuģın qorqınıshlı illet. Bul illet demokratiya hám huqıq ústinligi tiykarlarına zıyan jetkeredi, insan huqıqlarınıń buzılıwına, nızam ústinliginiń izden shıǵıwına, sonday-aq, bazar ekonomikası reformalarına tosqınlıq etip, turmıs sapasın tómenletip, insanlardıń qáwipsizligine qáwip tuwdıratuǵın unamsız aqıbetlerdi júzege keltiriwge sebep boladı. Ashınarlısı, hár qanday insanda, ol ápiwayı puqara yamasa lawazımlı shaxs bolsın, olarǵa salıstırǵanda mámleketke hám nızam ústinligine bolǵan isenimniń joǵalıwına jáne juwapkershiliktiń sózsizligi principiniń kriziske ushırawına alıp keledi. Nátiyjede lawazımlı shaxslardıń para alıwı hám lawazım wákilliklerinen qastan paydalanıwı ádettegi jaǵday sıpatında qabıl etiliwi, ápiwayı puqaralarda bolsa "para bermey máseleni sheshiw múmkin emes" degen psixologiya hám instinkttiń qáliplesiwine alıp keledi. Mámleketimiz basshısı Sh.Mirziyoev prezidentlik lawazımına kirisiwiniń dáslepki kúnlerinde-aq, yaǵnıy 2017-jıl 3-yanvar kúni Ózbekstan Respublikası Prezidenti "Korrupciyaǵa qarsı gúresiw haqqında"ǵı Nızamǵa qol qoydı. Usı Nızamǵa bola, korrupciyaǵa tómendegishe táriyp berildi, yaǵnıy korrupciya - shaxstıń lawazım yamasa xızmet dárejesinen jeke mápleri yamasa basqa shaxstıń mápi jolında materiallıq yamasa materiallıq emes payda alıw maqsetinde nızamǵa qayshı túrde paydalanıwı, sonday-aq, bunday paydanı nızamǵa qayshı túrde usınıw bolıp tabıladı. Bunnan tısqarı, korrupciyaǵa qarsı gúresiw tarawındaǵı mámleketlik siyasattıń tiykarǵı baǵdarları xalıqtıń huqıqıy sanasın hám huqıqıy mádeniyatın arttırıw, jámiette korrupciyaǵa qarsı qatań múnásibetlerdi qáliplestiriw, mámleketlik hám jámietlik rawajlanıwdıń barlıq tarawlarında korrupciyanıń aldın alıwǵa baylanıslı ilajlardı ámelge asırıw, korrupciyaǵa baylanıslı huqıqbuzarlıqlardı óz waqtında anıqlaw, olarǵa shek qoyıw, olardıń aqıbetlerin, olarǵa imkaniyat beretuǵın sebepler menen sharayatlardı saplastırıw, korrupciyaǵa baylanıslı huqıqbuzarlıq islegenlik ushın juwapkershiliktiń sózsiz ekenligi principin támiyinlew ekenligi belgilendi.
Sonday-aq, Prezidentimizdiń "Ózbekstan Respublikasında korrupciyaǵa qarsı gúresiw sistemasın jedellestiriw boyınsha qosımsha ilajlar haqqında"ǵı 2020-jıl 29-iyun kúngi PP-6013-sanlı Pármanınıń qabıl etiliwi mámleketimizde korrupciyaǵa qarsı gúresiw tarawında úlken burılıs jasadı.
Sebebi, bul Pármanda Ózbekstan Respublikası korrupciyaǵa qarsı gúresiw agentliginiń shólkemlestiriliwi belgilengen. Oǵan bola, agentlik korrupciyanıń aldın alıw hám oǵan qarsı gúresiw tarawında mámleketlik siyasattı qáliplestiriw hám ámelge asırıw, mámleketlik uyımlar, ǵalaba xabar quralları, puqaralıq jámieti institutları hám basqa da mámleketlik emes sektor wákilleriniń birgeliktegi nátiyjeli jumısın támiyinlew, sonday-aq, bul tarawdaǵı xalıqaralıq birge islesiw ushın juwapker bolǵan arnawlı wákillikli mámleketlik uyım esaplanıp, óz jumısın nızamlılıq, ádillik, esap beriwshilik, ashıq-aydınlıq principleri tiykarında basqa da mámleketlik uyımlar, mákemeler hám olardıń lawazımlı shaxslarınan biyǵárez túrde ámelge asıradı. Ózbekstan Respublikası Prezidentine boysınadı hám Ózbekstan Respublikası Oliy Majlisi palataları aldında esap beredi. Pármanǵa bola, agentliktiń wazıypaları hám baǵdarları sıpatında, mámlekette korrupciya jaǵdayınıń sistemalı tallanıwın támiyinlew, sonday-aq, korrupciyaǵa baylanıslı qáwip joqarı bolǵan tarawlar hám korrupciyaǵa baylanıslı huqıqbuzarlıqlar júz beriwiniń sebep hám sharayatların anıqlaw, korrupciyanıń aldın alıw hám oǵan qarsı gúresiw tarawındaǵı mámleketlik siyasattı, korrupciyaǵa baylanıslı huqıqbuzarlıqtıń sistemalı sebep hám sharayatların saplastırıw, normativlik-huqıqıy hújjetler hám olardıń joybarların korrupciyaǵa qarsı ekspertizasınıń nátiyjeliligin támiyinlew, korrupciyaǵa qarsı gúresiw tarawındaǵı nızamshılıqtı jetilistiriw, xalıqaralıq standartlardı hám aldınǵı sırt el ámeliyatın engiziw boyınsha usınıslardı islep shıǵıw hám ámelge asırıw anıqlanǵan korrupciya jaǵdaylarına óz waqtında tásir ilajlarınıń kóriliwin támiyinlew, mámleketlik xızmetke hadallıq standartı ("hadallıq vakcinası") hám mápler soqlıǵısıwın sheshiw standartların engiziwge járdemlesiw boyınsha tásirsheń ilajlardı kóriw sıyaqlı bir qatar áhmietli baǵdarlar belgilendi. Juwmaq ornında aytıw kerek, korrupciyaǵa qarsı gúresiw tek ǵana korrupciyaǵa qarsı gúresiw uyımlarınıń emes, al hár birimizdiń wazıypamız. Sonda ǵana biz mámleketimizdi korrupciyadan jıraq aymaqqa aylandırıwǵa, nızamlı, demokratiyalıq mámleketke aylanıwına hám xalıqtıń jaqsı turmıs sharayatlarında jasawına erisemiz.